Serokê Amedsporê Nahît Eren diyar kir ku biryara vekirina pankarta bîranîna Mustafa Kemal ne biryara wan bûye û got: “Di vê hefteyê de hemû tîm bi heman pankartê derketin maçê.”
Serokê Amedsporê Nahît Eren li Tesîsa Amedsporê ya Şehmus Ozer têkildarî rewşa Amedsporê civîna çapemeniyê li dar xist. Rêveberên Amedsporê jî tev li civînê bûn.
‘Armanca me serkeftin e’
Nahît Eren bi bîr xist ku rêveberiya wan di 18ê Cotmehê de hate bijartin û got: “Piştî em hatin rêveberiyê, me bi lez û bez dest bi karên qlûbê kir. Piştî hatin me fêm kir ku barek giran li ser milê me û listîkvana ye. Di maçên dawî de tîma me her serkeftî ye. Ev jî nîşan dide ku armanca me ya ku em di rêzên pêş ên lîgê de bin. Niha rewşa tîma me û puanên wê serkeftî ye. Armanca me mezin e. Em li ser bawerî û biryara serkeftinê dixebitin.”
‘Pankart li ser biryara TFFê hatiye vekirin’
Nahît Eren bal kişand ser maça roja Şemiyê ya li Stada Tahîr Elçî ku lîstikvan bi pankarta “bîranîna Mustafa Kemal” derketin sehê û wiha got: “Gelek şîrove û rexneyên neheq li ser pankartê li me hatin kirin. Dema tîmek derdikeve maçê bi biryara Federasyona Futbolê ya Tirkiyeyê (TFF) derdikeve maçê. Em tîmek girêdayî TFFê ne. Biryara vekirina pankarta bîranîna Mustafa Kemal jî biryara TFFê bû, di hemû maçên vê hefteyê hemû tîm bi heman pankartê derketin maçê. Lewma biryara vekirina pankartê ne me daye.”
‘Tîma me û alîgirên me aştîxwazin’
Nahît Eren bal kişand ku tîm û alîgirên wan her dem li gorî ruhê futbolê yê dostaniyê, aştiyê û wekheviyê tevdigerin û wiha got: “Em ji niha şûn ve naxwazin tu astengî li pêşiya tîma me û alîgirên me hebe. Em û alîgirên xwe çawa maçên dostane û aştiyane dixwazin, em dixwazin tîm û alîgirên din jî li hemberî me wisa tevbigerin û dirûşmeyên li dijî me nebêjin.”
