Tîma Amedsporê dê sibe ji bo maça hefteya 9emîn a Lîga Super biçe Samsûnê.
Di hefteya 9emîn a Lîga Super de Amedspor û Samsûnspor dê roja şemiyê saet 19.00an li Samsûnê werin pêşberî hev. Tîma Amedsporê vaye çend roj in amadekariyên maçê li Tesîsên Sporê yên Şehmûs Ozer berdewam dike û dê amadekariyên xwe bi antremana sibe bi dawî bike. Sibe piştî antremana dawî ya amadekariyên maça Samsûnsporê tîma Amedsporê dê saet 17.00an bi balafirê berê xwe bide Samsûnê û li benda saeta maçê raweste.
Amedspor piştî ku derket Lîga Superê her hefteya ku maça wê hebe balê dikişîne ser xwe û lîstika dilîze. Di encama 8 hefteyan de Amedspor niha di rêza 2yemîn a Lîga Super de ye. Her wiha di 5 maçên dawîn de Amedspor têkneçûye û dixwaze ji Samsûnê bi 3 pûanan vegere. Ji aliyê din ve Samsûnspor di Lîga Super de di nava tîmên herî qels de ye û di rêza 17emîn de cih digire. Di 5 maçên dawîn de Samsûnspor tevahî têk çûye.
Li gor daneyên fermî ji bo maça li Samsûnê were lîstin ji alîgirên Amedsporê re 1508 kursî hatine veqetandin û heya niha 908 bilêt hatine firotin. Her wiha ji bo alîgirên Samsûnsporê jî 23.513 kursî hatine veqetandin û heya niha 10.473 bilêt hatine firotin.
Ev hefteya ji bo tîma Amedsporê gelekî girîng e. Ji ber ku vê hefteyê Galatasaray û Fenerbahçe dê werin pêşberî hev. Ger Amedspor ji Samsûnê bi 3 pûanan vegere Amedê dê ji bo rêza yekemîn a Lîga Superê li benda encama maça Galatasaray û Fenerbahçeyê raweste. Heger Galatasaray têk biçe yan jî ew û Fenerbahçe wek hev bimînin ê Amedspor di Lîga Super de carek din bibe tîma yekemîn.
