Rêveberiya Amedsporê derbarê dibistanên fûtbolê û Amedstoreyê de civîna çapemeniyê li dar xist. Di civînê de hat gotin ku ew dê xebatên xwe xurttir bikin.
Rêveberiya Amedsporê, derbarê Dibistanên Fûtbolê ya Amedsporê û Amedstoreyê de li Tesîsên Şehmus Ozer a li navçeya Peyasê ya Amedê civîna çapemeniyê li dar xist. Berpirsyarê Medya û Têkiliyan Eser Sonmez, Berpirsyarê Dibistanên fûtbolê Nurullah Edemen, Berpirsyarê Binesaziyê Hadî Yakişan, Koordînatorê Binesaziya Amedsporê Sertaç Kuçubayrak, Koordînatorê Giştî yê Dibistanên Fûtbolê Akîf Gozmen, Berpirsyarê Amedstoreyê Taha Ûlgen di civînê de amade bûn.
‘Em ê siberoja Amedsporê bi van dibistanan ava bikin’
Berpirsyarê Dibistanên Fûtbolê Nurullah Edemen derbarê dibistanan de axivî û wiha got: “Tîma me di demeke kurt de serkeftinên mezin bi dest xistin. Ji bo ku em vê yekê bidomînin em ê xebatên xwe bê navber bidomînin. Me hemû xebatên dibistanên xwe yên futbolê qedandin. Ji îro pê ve em ê serlêdanan bigirin û bixin jiyanê. 14 hezar kesan berê serlêdan kiribûn ku di binesaziya me de bin. Li vir armanc tenê ne qezenckirina werzişî ye, dê ev yek nêrîna rast a ji bo jiyanê pêk bîne. Dibistanên Futbolê yên Amedsporê hem di warê werzişî hem jî di warê kesayetî de dê bibe sedema geşedanên girîng. Em ê siberoja Amedsporê bi van dibistanan ava bikin. Em ê ciwanên ku me tespît kirine bînin bajar û li vir bixin kampê. Em ê li vir hewl bidin ku ya herî baş derxin holê.”
‘Li 17 bajaran em gihîştin bi hezaran ciwanan’
Koordînatorê Binesaziyê yê Amedsporê Sertaç Kuçukbayrak jî da zanîn ku ew xurtkirina binesaziya dibistanên werzişê gelek girîng dibînin û wiha axivî: “Di 15 mehên dawî de ji bo binesaziyê xebatek mezin heye. Em jî di vê mijarê de xebatê dimeşînin. Xistina vê ya jiyanê ji bo me elzem e. Di pêvajoya 15 mehan de li ser baştirkirina fizîkî hat xebitîn. Em li ser bingehê nirxên xweser û baweriya xweser a Amedsporê xebatan dimeşînin. Tîmeke ku di Lîga PAFê de bi hêza xwe ya xweser dikare serkeftinê bi dest bixe heye. Li 17 bajaran em gihîştin hezaran ciwanan û me xebatên xwe meşandin.”
‘Kampanyaya zarokê bêforme bila nemîne dest pê dike’
Berpirsiyarê Amedstoreyê Taha Ulgen jî derbarê Amedstoreyê de axivî û diyar kir ku ji bo berheman bigihînin alîgiran ew di nav xebatê de ne û ev yek anî ziman: “Li ser pirsgirêkên ku di gihandina formeyan a ji bo alîgiran de hatine jiyîn em ketin nav xebatên çareseriyê. Me dest pê kir ku berhema xwe bi xwe hilbirînin. Dê xebateke ku rengê me û çanda me hildigire pêk tê were meşandin û em li ser xaleke ku nirxên me hildigire tevgeriyan. Armanca me ew e ku em li Mêrsîn, Îzmîr û Wanê dikanan vekin. Her wiha em ê li Parîs û Londrayê jî vekin. Ne tenê Amed, li bajarên wekî Mêrdîn û Wanê em ê berhemên ku bi hilberîna jinan derketine holê bi gel re bicivînin. Em ê kampanyaya ‘Zarokê me yê bêforme nemîne’ pêk bînin û ji gundan heya navçeyan formeyan li zarokan belav bikin. Meha pêş em ê vê xebatê bidin destpêkirin.”
