Li Erebistana Siûdî, ji destpêka sersalê û vir ve 100 kes hatin darvekirin. Rêxistinên mafên mirovan di mijara darvekirinên bê adilan e de bi fikar in. Di bûyerên darvekirinê de piştî Çîn û Îranê Erebistana Siûdî di rêza sêyemîn de ye.
Wezareta Karên Hundir a Erebistana Siûdî bi daxuyaniyek ragihand ku roja sêşemê 7 kes hatin darvekirin û hat gotin ku ji kesên hatin darvekirin pênc jê bi sûcdariya bazirganiya narkotîkê hatibûn mehkûmkirin.
Bi vî rengî ji destpêka sala 2026an û vir hejmara kesên li Erebistana Siûdî hatine darvekirin gihîşt 100 kesî.
Rêxistina Efûyê ya Navneteweyî ev hejmar weke ‘Qonaxeke tarî ya asta dijberiya hiqûqê û bikaranîna cezayê mirinê ji aliyê otorîteran ve’ pênase kir.
Li gorî daneyên AFPê, ji 100 kesên ku ji destpêka salê û vir ve hatine darvekirin 65 ji wan ji sûcê narkotîkê hikum xwaribûn.
Hat ragihandin ku ji kesên hatine darvekirin 52 ji wan biyanî bûne. Mirovên ji Etiyopya, Pakistan, Sûdan, Yemen û Sûriyeyê di nava kesên hatin darvekirin de hebûn.
Amnesty International diyar kir ku biyanî piştî pêvajoyên darizandinê yên bi giranî ne adîl, bi cezayê mirinê hatine cezakirin.
Rêxistina Efûyê ya Navneteweyî di rapora xwe ya dawî de ragihand ku herî kêm 63 mehkûmên Etiyopyayî yên li girtîgeheke li başûrrojavayê Erebistana Siûdî têne ragirtin û bi sûcdariya narkotîkê hatine mehkûmkirin, dibe ku di demeke nêz de bêne darvekirin.
Rêxistinê bang kir ku cezayê darvekirinê bê rawestandin û doz li gorî pîvanên hiqûqa navneteweyî jinûve bêne nirxandin.
Piştî Çîn û Îranê di rêza sêyemîn de ye
Erebistana Siûdî di sala 2025an de 356 kesan darve kiribû û gihîştibû asta herî bilind a darvekirinên salên dawî.
Erebistana Siûdî li gorî hejmara darvekirinên çar salên dawî li cîhanê piştî Çîn û Îranê di reza sêyemîn de ye.
