Jinan di salvegera windabûna Rojîn Kabaîşê de li Enqereyê daxuyanî da û xwestin kuştina Rojîn Kabaîşê bê ronîkirin.
Jinan bi pêşengiya Komîsyona Ji bo Rojîn Kabaîşê Edalet li Enqereyê tekildarî Rojîn Kabaîşê ya ku di 27ê Îlona 2024an de piştî winda bû bi awayekî guman mirî hat dîtin û tevî salek ji ser re derbas bû jî kujer nehat dîtin daxuyanî da. Daxuyanî li kolana Sakaryayê ya navçeya Çankayayê hat dayîn û gelek saziyên jinan û jin beşdarî daxuyaniyê bûn. Di daxuyaniyê de pankarta “Rojîn salek e ku li pey edaletê ye, Saziya Tipa Edlî DNAya 2an aşkera bike” dinivîsî vêkirin. Her wiha jinan dovîzên ku li ser, “Çi hat serê Rojîn Kabaîşê” û “Rojîn Kabaîşê xwe nekuştiye” hilgirtin. Jinan dirûşmeyên, “Jin jiyan azadî”, “Jinên hatinê qetilkirin raperîna me ne” û “Zilam dikujê dewlet diparêze” berzkirin.
Di daxuyaniyê de Zeliha Taşkiran axivî û bi lêv kir ku tevî salek di ser re derbas bûye jî kuştina Rojîn Kabaîşê nehatiyê ronîkirin. Zeliha Taşkirinê anî ziman ku kuştina Rojîn Kabaîşê yek ji encama polîtikayên bêcezahiştinê ya dewletê ye û wiha got: “Delîlên li pey Rojîn Kabaîşê ma ne nehatin ronîkirin. Lêkolîneke bi bandor nehat kirin. Gotin Rojînê xwe kuştiye û bi vê yekê xwestin li ser bûyerê bigrin. Xwestin rastiyan ji parêzer û malbatê veşerêrin. Li ser laşê Rojînê DNAya 2 zilaman hatin tespitkirin. Tevî vê yekê jî yên bi guman nehatin binçavkirin. Tevî ew qas delîlan jî hê jî dibêjin Rojînê xwe kuştiye. Berovajî vê xwestin malbatê û kesên ji bo Rojînê edaletê dixwazin bêdeng bikin. Em jin dipirsin ji bo çi kuştina Rojînê nayê ronîkirin? Hûn çi vêdişêrin? Delîl hatin windakirin. Kujerên Rojînê tên parastin.”
Zeliha Taşkirinê di berdewama axaftina xwe de destnîşan kir ku Rojîn Kabaîş ne dozek e, ji bo jinan têkoşîna edaletê ye û daxwazên xwe wiha rêz kir:
“*Divê b,ryara veşartinê ya li ser dosyayê bê rakirin û malbat û raya giştî bigihêje rastiyan.
*Delîlên ku kêm ma ne bila bên berhevkirin û bi awayekî zelal ji raya giştî re bên parvekirin.
*DNAyên li ser laşê Rojînê hatine tespîtkirin aydî kê ne bila bê aşkerekirin.
*Saziyên ku ji bûyera Rojînê berpirsyar in bila hesab bidin.
*Ji bo mafê jiyanê yê jinan bê parastin dewlet berpirsyariya xwe bi cih bîne.
*Bila malbata Rojînê tenê neyê hîştin, piştgiriya hiqûqî û manevî bê dayîn.”
