Stenbol – Hevserokên Zimanxane Hulya Darak û Aslan Demîr diyar kirin ku li Stenbolê milyonan Kurd hene lê axaftina Kurdî kêm e û wiha gotin: “Zimanê Kurdî di nava xetereyekî mezin de ye. Zimanxane bi awayekî komunî hat avakirin. Gelê me li Zimanxaneyê Kurdî biaxivin û bijîn. Armanca komeleyê ya serekê dayîna perwerdeya bi Kurdî ye. Em bi rêya vê komeleyê dixwazin ziman û dîroka Kurdî hîn bikin.”
Li Stenbolê dê di 21ê Hezîranê de li navçeya Umraniyê komeleyek zimanê Kurdî yê bi navê Komaleya Lêkolîn û Pêşvexistina Ziman û Çanda Kurdî (Zimanxane) tê damezrandin. Di komeleyê de ji bo zarok û ciwanan bernameyên çandî û Kurdî bên lidarxistin.
Hevserokên Zimanxaneyê Hulya Darak û Aslan Demîr derbarê avakirina komeleyê de ji ajansa me re axivîn.
‘Gelê me jî li Zimanxaneyê Kurdî biaxivin û bijîn’
Hulya Darak anî ziman ku li Stenbolê bi milyonan Kurd dijîn lê bi hezaran zarokên kurd nikarin bi Kurdî biaxivin û ev tişt anî ziman: “Ji bo wê jî em komeleyek ava dikin da ku zarokên Kurd bi zimanê xwe biaxivin. Em bi rêya vê komeleyê dixwazin ziman û dîroka Kurdî hîn bikin. Xebatên me ber bi dawiyê ve diçe. Em dixwazin Kurdên li Stenbolê dijîn werin li vir û Kurdî hîn bibin. Li vir 3 pol hene, 2 pol ji bo kesên temen mezin yek jî ji bo zarokan e. Em ê li vir ji bo zarokan şanoyan li dar bixin, koroya zarokan ava bikin û xebatên çandî bikin. Em naxwazin tu kes bi zorê bê li vir, em dixwazin bi keyfxweşî herkes werin li vir. Kesên ku werin li vir dê zimanê xwe pêş bixin û her wiha yên xwe jî nas bikin. Ger kesek dîroka xwe bizanibe ji zimanê xwe şerm nake. Ji ber pergal dixwaze ciwan ji zimanê xwe şerm bikin. Zarokên ku werin li vir dê hîn bibin ku divê axaftina zimanê Kurdî şerm nekin. Zimanxane jî ji bo herkesî baş bibe û Zimanxane bibe cihekî cuda. Gelê me jî li Zimanxaneyê Kurdî biaxivin û bijîn.”
‘Em benda xwedîderketina gelê xwe ya Zimanxaneyê ne’
Aslan Demîr jî destnîşan kir ku bi rêya komunê komeleyek wisa derket holê û ev tişt vegot: “Zimanê Kurdî di nava xetereyekî mezin de ye. Berî çend rojan ez çûm gund û li wir min dît ku zarok Kurdî neaxivin. Ji bo zarok zimanê xwe hîn bibin Zimanxane jî hewceriyekî mezin e. Em ê 21ê Hezîranê bi awayekî fermî komeleyê ava bikin. Zimanê her netewî girîng e lê zimanê me ji bo gelek girîng e. Hîn zaravayên Kurdî di bin xetereyek mezin de ne. Di nava siyasetê de jî zimanê Kurdî bûye zimanê silavdayînê, ev jî li pêşiya pêşxistina zimanê Kurdî ye. Zimanxane bi awayekî komunî hat avakirin. Herkes piştgirî da me, em jî hêvî dikin ku gel piştgirî bide me. Armanca komeleyê ya serekê danîna perwerdeya bi Kurdî ye. Em benda gelê xwe ne ku xwedî Zimanxaneyê derkevin.”
