Alîgirên tîma başûrê Kurdistanê Zaxosporê û malbat û hevalên golavêjê Amedsporê Mbaye Diagne, beriya maça krîtîk a Bodrumsporê ji bo piştevaniyê hatin Amedê.
Amedspor a ku di Lîga 1emîn a TFFê de ji bo biçe Lîga Super têdikoşe, amadakariyên xwe yên ji bo maça Bodrumsporê didomîne. Beriya vê maça girîng, Alîgirên tîma başûrê Kurdistanê Zaxosporê û malbat û hevalên golavêjê Amedsporê Mbaye Diagne, beriya maça krîtîk a Bodrumsporê ji bo piştevaniyê hatin Amedê.
Komek alîgirên tîma Başûrê Kurdistanê Zaxosporê serdana klûba Amedsporê kirin. Alîgirên Zaxosporê bi Serokê Kûluba Amedsporê Nahît Eren û endamên lijneya rêveberiyê re civiyan. Di hevdîtina ku alîgirên Amedsporê jî lê amade bûn de, peyamên dostanî û piştgiriyê hatin dayîn. Alîgirên Zaxo Sporê ji bo maça sibê ji bo Amedsporê daxwaza serkeftinê kirin û destnîşan kirin ku dilê wan bi Amedsporê re lê dide.
Diyariyên dualî hatin dayîn
Di dawiya serdanê de alîgirên Zaxosporê, forma û stûmala tîma xwe diyarî Serokê Kûlubê Nahît Eren kirin. Serok Nahît Eren jî ji bo vê serdana watedar spasiya alîgiran kir û formaya Amedsporê pêşkêşî wan kir. Serdan bi wêneyekî bîranînê yê ku ruhê piştgiriyê nîşan dide bi dawî bû.
Malbata Mbaye Diagne ji Afrîkayê hat
Malbat û hevalên Mbaye Diagne ku ji Senegalê hatin, ewilî li navçeya dîrokî ya Sûrê geriyan û pişt re derbasî Tesîsên Şêxmûs Ozer bûn. Malbata Diagne li wir idmana dawî ya tîmê temaşe kir û piştgirî da golavêjê Amedsporê Mbaye Diagne.
Mesut Bakkal û lîstikvanan pêşwazî kirin
Mbaye Diagne ji ber vê serdana surprîz gelek kêfxweş bû. Teknîkdîrektorê Amedsporê Mesut Bakkal û lîstikvanên tîmê bi mêvanên ji Senegalê re wêneya bîranînê kişandin. Tê payîn ku malbata Diagne di maça Bodrumsporê de jî li tribunê cihê xwe bigire û piştgiriyê bide tîmê.
Amedspor heke Bodrumsporê derbas bike, dê li benda encama maça Sariyer û Eroksporê bimîne da ku şampiyoniya xwe ragihîne.
