Amed – Sekreterê SESê ya Şaxa Amedê Ûmît Çetîner têkildarî Peymana Kar a Komî diyar kir ku eger ku daxwazên wan pêk neyên ew ê dest bi çalakiyan bikin û got: “Em ê li Enqerê konê danûstandinên peymanê vekin û dest bi greva giştî bikin.”
Di navbera sendîkayan û Wezareta Tenduristiyê de hevditînên Peymana Kar a Komî berdewam dikin. Hevdîtinên 8emîn di 1ê Tebaxê de dê dest pê bike. Berî hevditînan Sendîkaya Kedkarên Tenduristiyê û Xizmetên Civakî (SES) dest bi çalakiyan kir û daxwazên xwe tînê ziman. Sekreterê SESê ya Şaxa Amedê Ûmît Çetîner têkildarî daxwazên ku dikin ji ajansa me re axivî.
‘Em ê mafên karkeran biparêzin’
Ûmît Çetîner diyar kir ku di navbera sendîka û bi Wezareta Tenduristiyê de heta niha heft caran hevdîtin pêk hatin û got: “Di hevdîtinan de her carî jî ti lihevhatinek pêk nehat û sendîka zirarê dibînin. Di hemû hevdîtinana de sendîkayên zer hebûn û ev yek bû sedema nelihevkirinê. Ji ber ku tevahî sendîkayên zer pêşniyarên desthilatê bi erênî qebûl dikin û ji bo berjewemendiyê karkeran tu tiştî naxwazin. Em jî wekî SESê dibêjin ku em ê ji bo berjewemendiyên karkeran hevdîtinan pêk bînin û mafên karkaran biparêzin. Lê em dibînin ku îro hevdîtin wekî şanoyê pêk tên. Çareserî yekbûna sendîkayî ye û xwerêxistinkirin e.”
‘Divê qanûnên sendîkayê werin çêkirin’
Ûmît Çetîner destnîşan kir ku heta dawiyê ew ê li pişt mafên karkerên tenduristiyê bin û daxwazên SESê yên ji bo girêbesta kar ev yek anîn ziman: “Divê qanûnên sendîkayê werin çêkirin û mafên grevê di nav qanûnan de cihê xwe bigire. Divê qanûna taşeron were rakirin û tevahî karker di nava kadroyan de cihê xwe bigirin. Hewce ye rêjeya bacê yê li ser karmendan were rawestandin û bibe ji sedî %10. Divê xizmeta tenduristiyê bêpere pêk were. Kesên ku bi rêya KHKê ji karê xwe hatine dûrxistin divê dîsa vegerin ser karê xwe. Divê mûlakat were rakirin.”
‘Em ê dengê xwe ji qadê bilind bikin’
Ûmît Çetîner anî ziman ku daxwazên wan pêk neyên ew ê dest bi çalakiyan bikin û axaftina xwe wiha bi dawî kir: “Ne tenê di hevdîtinan de em ê daxwazên xwe bînin ziman. Em ê ji bo ku daxwazên me werin qebûl kirin li her qadê dengê xwe bilind bikin û têkoşîna xwe berdewam bikin. Eger ku daxwazên me neyên qebûlkirin em ê li Enqerê konê danûstandinên peymanê vekin û em ê daxwazên karkeran bînin ziman. Piştre em ê greveke giştî û bi giştî dest ji kar berdin.”
