Nivîskar û siyasetmedarê Kurd Hamît Geylanî ku li Enqereyê jiyana xwe ji dest dabû, li gundê Dêmanê yê girêdayî navçeya Şemzînan bi girseyî hat veşartin.
Nivîskar û siyasetmedarê kurd Hamît Geylanî ku li Enqereyê jiyana xwe ji dest dabû, li gundê Dêmanê yê navçeya Şemzînan a Colemêrgê bi girseyî hat veşartin. Cenazeyê Geylanî li Balafirgeha Esenboga ya Enqereyê ber bi Geverê re hat oxirkirin û li Balafirgeha Selahattîn Eyyubî ya Geverê ji hêla hezaran ve hat pêşwazîkirin. Cenaze, bi konvoyeke ji sedan wesayîtan pêk dihat, ber bi Gundê Dêmanê ve rê ket. Cenazeyê Geylanî bi tevlibûna malbata wî, Hevserokê Giştî yê Partiya Wekhevî û Demokrasiyê ya Gelan (DEM Partî) Tûncer Bakirhan, siyasetmedarên jin ên kurd Gultan Kişanak û Sebahat Tuncel, endama Şandeya Îmraliyê ya DEM Partiyê û parlementera Wanê Pervîn Buldan, Hevşaredarên Bajarê Mezin ên Wanê Neslihan Şedal û Abdullah Zeydan, hevşaredarên Geverê, rêxistinên DBP û DEM Partiyê yên Colemêrgê, nûnerên saziyên sivîl û gelek kesan li Dêmanê hat veşartin.
‘Em ê aştiyeke birûmet diyarî Hamît Geylanî bikin’
Ewilî li goristana malbatê nimêja cenazeyî hat kirin û dûre bi duayan spartin axê. Siyasetmedar Gultan Kişanak li vir axivî û da zanîn ku wan hevalekî xwe yê bi qîmet winda kir û got: “Me rojekê jî li rûyê kekê Hamît bêhêvîtî nedît. Di demên herî dijwar de jî Kekê Hamît di dilê me de bû tîrêjên hêviyê. Kekê Hamît ewqasî evîndarê gelê xwe bû, ji bo welatê xwe her saniye di nava têkoşînê de bû. Têkoşîn, berxwedan û welatparêzî ji bo me hemûyan hişt. Em ê aştiyeke bi rûmet pêşkêşî we û hemû hevrêyên xwe yên mîna Geylanî bikin.”
‘Bi israr têkoşiya’
Piştre Hevserokê Giştî yê DEM Partiyê Tûncer Bakirhan axivî û ev tişt anî ziman: “Sebrê ji hemû gelê Colemêrgê, Şemzînan û gelê kurd re dixwazim. Îro em gelekî xemgîn in, ji ber ku me hevalekî kedkar winda kir. Ji bo gelê xwe kedeke mezin da. Di zindanan, îşkence û gelek zextan de ma, lê dîsa jî bi israr têkoşiya. Tenê daxwaza wî ew bû ku ev pêvajo serbikeve û aştiyeke birûmet bğ. Rêheval, bav û hevalê me di jiyana xwe de nivîsî, siyaset kir û heta kêliya xwe ya dawî ji bo azadiya gelê kurd têkoşîn da.”
‘Her tim bi gelê kurd re bû’
Li ser navê malbatê Seyît Nurettîn Geylanî jî spasiyên xwe pêşkêşî hemû kesan kir û got: “Ez şerm dikim ku bêjim birayê Hamît im. Ew birayê herkesî bû. Ez bejna xwe bi rêzdarî li ber mîrateya wî ditewînim. Em hêvîdar in ku hêviyên Hamît ên aştî û azadiyê bi aşitiyê bên xemilandin. Ji ber ku yekane hêvî û daxwaza wî têkoşîn bû û her tim bi gelê kurd re bû.”
Piştî axaftinan malbatê li ber mizgefta gund şîn danî û siyasetmedar û girseyê jî serdana şînê kir.
