Hevşaredarê berê yê Xinûsê û neviyê Şêx Seîd Hasan Basrî Firat ku li Almanyayê jiyana xwe ji dest da, li Dortmundê bi merasîmeke girseyî ber bi bajarê wî ve hate şandin.
Bi pêşengiya Kongreya Neteweyî ya Kurdistanê (KNK) û Kongreya Civakên Demokratîk a Kurdistaniyên li Ewropayê (KCDK-E) bi Salona Galla Eventê merasîm hate lidarxistin. Piştî merasîmê cenazeyê Firat ji bo veşartinê ber bi navçeya Xinûs a Erzîromê hate şandin.
Cenazeyê Hasan Basrî Firat ku li nexweşxaneya Helios Universitaetsklinikum a Wuppertalê 27ê Tîrmehê jiyana xwe ji dest da, serê sibehê ji aliyê ferdên malbatê û nûnerên KNK û KCDK-Eyê ve ji nexweşxaneyê hate wergirtin.
Cenaze birin Salona Galla Event a Dortmundê ku merasîm lê hate lidarxistin. Gelek Kurdistanî, siyasetmedarên Kurd ên li sirgûnê û endamên malbatê tevli merasîmê bûn.
Derdora darbesta Firat bi kulîlkan hate xemilandin û destegulên KNK û KCDK-Eyê hate danîn. Li dû bicihanîna wecîbeyê olî Serokê Giştî yê CÎKê Mele Cemal Bîngol nimêja cenaze da kirin. Piştî nimêja cenaze bi navê malbatê hevjîna wî Sitti Firat û siyasetmedar Hişyar Ozsoy axivîn û spasiya beşdaran kir.
Piştî axaftinan KNK, KCDK-E û malbata wî serdanên sersaxiyê qebûl kirin. Cenazeyê Hasan Basrî Firat ji bo veşartinê ber bi gundê Qolhisar ê Xinûsê ve hate şandin.
