Li Girtîgeha Ewlehiya Bilind a Eregliyê ya Konyayê zext li girtiyan tê kirin û 7 girtiyên ku cezayê wan qediya ye jî bi awayekî kêfî nayên berdan.
Li Girtîgeha Ewlehiya Bilind a Eregliyê ya Konyayê, ji aliyê îdare û dozgerê girtîgehê ve zext li girtiyên siyasî tê kirin û berdana 7 girtiyan tê taloqkirin. Malbatên girtiyan ên ku îro ji bo hevdîtina xizmên xwe çûn girtîgehê, diyar kirin ku di girtîgehê de gelek pirsgirêk û binpêkirina mafên girtiyan diqewime.
Malbatan ji ajansa me re qala pirsgirêk û binpêkirina mafên girtiyan kir û wiha got: “Dozgerekî nû hatiye girtîgehê. Ji dema hatina vî dozgerî û vir ve, berdana 7 girtiyan hat taloqkirin, atolyeyên wan ji 5 rojan daxistin 2 rojan û saetên wan ên derketina baneşînê jî hatiye kêmkirin.”
‘Hewl didin gotina peyva ‘terorîst’ li ser girtiyan ferz bikin
Malbatan diyar kir ku dema girtî di daxwaznameyên xwe de peyva, ‘Rêberê Gelê Kurd Abdullah Ocalan’ bikar tînin dozger li hember vê yekê derdikeve û ev yek anîn ziman: “Hine caran dema ku girtî di nav xwe de diaxivin an jî daxwaznameyan dinivîsin, eger bibêjin, “Ji bo Rêberê Gelê Kurd Abdullah Ocalan”, dozger dibêje, ‘divê hûn bibêjin serokê terorîstan’, ji bo rêxistinê jî divê bibêjin ‘terorîst’. Hin caran dema girtî diçin qewîşan, heqaretê li wan dikin û wan bi neberdanê tehdît dikin.”
‘Bi 2 kelepçeyan dibin nexweşxaneyê’
Malbatan dan zanîn ku dema xizmên wan dibin nexweşxaneyê du heb kelepçeyan têxin destê wan û wiha domand; “Dema girtiyan dibin nexweşxaneyê, du kelepçeyan li destên wan dixin û zexta psîkolojîk li wan dikin. Girtîgeh ji aliyê paqijiyê ve jî ne baş e û her tim bêhna kanalîzasyonê tê, ji ber bêhnê nikarin paceyên odeya xwe vekin.”
‘Ger pirsgirêk neyên çareserkirin em ê dest bi çalakiyê bikin’
Malbatan herî dawî diyar kirin ku girtiyan gotiye, ‘ger wiha berdewam bike ew ê dest bi çalakiyan bikin’ û wiha gotin: “Eger ev pirsgirêk di demeke kurt de çareser nebin, em ê êdî neçar bimînin ku dest bi çalakiyên derneketina telefonê û nedîtina malbatan bikin. Em wek malbatên girtiyan ji bo çareserkirina van pirsgirêkan bang li ÎHD, parlamento û partiyên siyasî dikin.”
