Serokkomariya Iraqê, dê cenazeyê 153 qurbaniyên Enfalê radestî Herêma Kurdistanê bike. Dê cenazeyan bişînin Silêmaniyê û li wir veşêrin.
Rêveberiya Parastina Gorên Bikom û Windayan ya ser bi Saziya Şehîdan ragihand ku dê îro 153 cenazeyên qurbaniyên êrişên Enfalê veguhezin Herêma Kurdistanê.
Rêveberiyê diyar kir ku hemû cenazeyên ku bên vegerandin ji jin û zarokan pêk tên û ji gorên bikom ên li çola Semaweyê ye hatine derxistin. Hat diyarkirin ku pêvajoya vekirin û derxistina cenazeyan bi hevkarî û koordînasyona Rêveberiya Bijîşkiya Dadî ya Iraqê birêve çûye û pêvajoya radestkirinê jî bi amadebûn û şopandina Şêwirmenda Serokkomarê Iraqê ya ji bo Karûbarên Windayan û Gorên Bikom Pervîn Nûrî ve pêk hatiye.
Biryare ku veguhestin û veşartina van cenazeyan ji bo Herêma Kurdistanê di qonaxa niha de bi awayekî demkî were pêkanîn. Ev yek jî heta ku test û lêkolînên zanistî û analîzên DNA li tiba edlî bi dawî dibin û nasnameya qurbaniyan were tespîtkirin. Piştî ku nasnameyên wan zelal bûn, merasîma veşartina wan a dawî dê were kirin û radestî malbatên wan werin kirin.
Di dawiya daxuyaniyê de, Rêveberiyê tekez kir ku hewldanên wan ên ji bo dîtina gorên bikom ên nehatine dîtin, eşkerekirina çarenûsa windayan û parastina rûmeta qurbaniyan heta ku mafên malbatên wan bi temamî werin misogerkirin, berdewam bikin.
