Amedsporê bi 6-1ê Bolûsporê têk bir. Amedspor a ku ji bo şampiyoniyê têdikoşe, serkeftineke girîng bi dest xist.
Di Lîga 1emîn a Trendyolê ya Federasyona Futbolê ya Tirkiyeyê (TFF) de Amedspor û Bolûspor di hefteya 33yemîn de li Stada Tahîr Elçî ya Amedê hatin hemberî hev. Bi deh hezaran alîgirên Amedsporê ku li stadê cihê xwe girtin, beriya maç dest pê bike dirûşm berz kirin û li ber stranan govend gerandin. Amedspor bi pankarta hişyariya avê ya “Av tune be pêşeroj tenê îhtîmaleke” derket maçê.
Amedspor ku bi lez dest bi maçê kir di deqîqeya 6an de bi gola Mehmet Yeşîl 1-0 ket pêşiya Bolûsporê. Amedspor a ku bandora xwe zêde kir gelek pozîsyon dîtin. Alîgiran di maçê de bêrawestan dirûşm berz kirin. Dema di maçê de deqîqe bû 21, alîgiran ronahiya telefonên xwe vêxistin û strana “Dîren Ha Diyarbekîr” gotin. Di deqîqeya 31an de lîstikvanê Bolusporê yê bi navê Dean Lîco di encama faûla kir de qertê sor girt û ji lîstikê hate derxistin.
Dû re di encama lîstika bi bandor de Amedsporê di deqîqeya 38an de bi gola Mbaye Diagne skor kir 2-0. Dû re tenê piştî sê deqîqeyan di deqîqeya 41an de Celal Hanalp gol avêt û skor kir 3-0. Beşa maçê ya ewil bi vê skorê bi dawî bû.
Amedsporê bi lîstekeke xweş û lez dest bi beşa duyemîn a maçê kir. Bi destpêka beşa ewil Cem Ustundag û Afena Gyan Felix derketin û li şûna wan Dia Saba û Adama Traore ketin lîstikê. Di beşa duyemîn de di pozîsyoneke ku Boluyê dît top ji stûna kaleyê zivirî. Dû re di deqîqeya 56an de dîsa Mbaye Diagne gol avêt. Amedspor piştî golê lîstika xwe ya bi bandor domand û pozîsyon ser pozîsyonê dît.
Piştre Mbaye Diagne û Sînan Kûrt ji lîstikê hatin derxistin û li şûna wan Tarkan Serbest û Çekdar Orhan ketin maçê. Dû re di deqîqeya 67an de Daniel Moreno gol avêt û skor bû 5-0. Piştre di deqîqeya 71an de Dia Saba gol avêt skor bû 6-0. Alîgirên Amedsporê bênavber dirûşm berz kir. Alîgiran di maçê de dirûşmên “Kesk Sor Her Bijî Amed”, “Kîne em, Kurd in em” û “Vaye alîgir vaye şampiyon” berz kir.
Dû re Daniel Moreno ji maçê hate derxistin û li şûna wî Zdravko Dimitrov kete maçê. Amedsporê gelek pozîsyon dîtin lê nekarî golek din biavêje. Piştre Bolûsporê di deqîqeya 90î de bi gola lîstikvanê xwe yê bi navê Arda Usluoglo gol avêt û skor bû 6-1. Maç bi vê skorê qediya.
Amedspor ku bi 70 pûanan di rêza duyemîn a Lîga 1emîn a Trendyolê de ye dê di 9ê Nîsanê de bi Eroksporê re bilîze ku di rêza sêyemîn de ye.
