Rêberê Gelê Kurd Abdullah Ocalan ji konferansa bi navê “Di Rojhilata Navîn de ji bo Aştiyê Perspektîfek” li bajarê Torîno yê Îtalyayê tê lidarxistin re peyamek şand û wiha got: “Divê siyaset bikeve li şûna çekan, hiqûq bikeve li şûna bêbaweriyê, û wekhevî bikeve li şûna înkarê. Rêya aştiya mayînde ev e.”
Şaredariya Torînoyê bi hevkariya Komîteya Mafê Mirovan a Herêmî û Rêveberiya Herêmî ya Pîemonteyê û bi piştgiriya Wexfa Teserûfê ya Torînoyê, bi navê “Di Rojhilata Navîn de ji bo Aştiyê Perspektîfek” konferansê li dar dixe. Gelek siyasetmedar, şaredar, aktîvîstên jin, parastvanên mafan, nûnerên rêxistinên demokratîk û dostên Kurdan tev li konferansê dibin.
Rêberê Gelê Kurd Abdullah Ocalan ji Konferansa Torînoyê re peyamek nivîskî şand.
Peyama Rêberê Gelê Kurd Abdullah Ocalan wiha ye:
“Dostên hêja…
Ez we ji Îmraliyê, bi hestên piştevaniya navneteweyî û azadiyê silav dikim. Hêvî dikim ku konferansa we ji bo avakirina yekitiya wekhev, azadiya gelan û aştiya mayînde ya li Rojhilata Navîn bibe alîkar.
Rojhilata Navîn îro di nav qonaxeke girîng de ye. Şer, pevçûn, çareseriyên dewlet-neteweyî û polîtîkayên ewlehiyê ji gelan re aştî û azadî neanîn. Ev tişt êdî eşkere ye. Ji ber vê yekê erka me ya bingehîn ew e ku em siyaseta şer berdin û siyaseta demokratîk esas bigirin; civakê birêxistin bikin û serdemeke nû ya ku jiyana hevpar a wekhev û azad a gelan mîsoger dike ava bikin.
Perspektîfa konfederalîzma demokratîk û Komara Demokratîk, yek ji sernavên sereke yên nîqaşê yên vê lêgerînê ne.
Fesixkirina PKKê û bidawîbûna stratejiya têkoşîna çekdarî, divê mîna destpêka serdemeke nû were dîtin. Ev guherîn, nêzîkatiyeke nû venêrîneke nû ya ji bo meseleyê jî neçar dike.
Divê em bi eşkereyî bibêjin ku bidawîbûna têkoşîna çekdarî bi tenê nayê wateya aştiyê. Ji bo ku di encama pêvajoyê de aştî mayînde bibe; divê sedemên pevçûnê ji holê werin rakirin, hebûn, ziman û çanda Kurdî were misogerkirin, astengiyên li ber siyaseta demokratîk werin rakirin û hemwelatiya wekhev bigihîje temînata hiqûqî.
Entegrasyona demokratîk, ne lihevanîna yekalî ye û ne jî tevlibûna bêşert a di nav sazûmaniya heyî de ye. Berovajî vê, divê bibe veguherîneke demokratîk ku cihêrengî nayên înkarkirin, maf têne naskirin û jiyana hevpar li ser bingeha wekheviyê tê avakirin.
Temînata siyaseta demokratîk komara demokratîk e, temînata civaka demokratîk jî hiqûq e. Bêyî temînatên hiqûqî, siyaseta demokratîk mayînde nabe û pêvajoya aştiyê jî nagihîje serkeftinê.
Çareserkirina pirsgirêka Kurd, ji demokratîkbûna Tirkiyê cûda nayê fikirîn. Demokratîkbûna Tirkiyê jî ji derketina îradeyeke siyasî ku jiyana hevpar, wekhev û azad a gelan dabîn dike cûda nîne.
Girîngiya perspektîfa konfederalîzma demokratîk a ji bo Rojhilata Navîn ev e. Çareserî ne di bin nasnameyekê de helandina gelan, ne sînor û cihêrengiyan kirina çavkaniya pevçûnan ne jî afirandina desthilatdariyeke nû ya dewletparêz e.
Tişta ku îro hewcedarî pê heye ev e: Li şûna siyaseta şer siyaseta demokratîk, li şûna înkarê naskirin, li şûna zorê hiqûq û li şûna perçebûna civakî jiyana hevpar a azad û wekhev. Ev veguherîn neçar dike ku dewlet û aktorên siyasî berpirsyariyê bigirin ser milên xwe, saziyên demokratîk bêtir werin xurtkirin û civak di derbarê paşeroja xwe de bibe xwedî gotin û biryar.
Dostên ezîz, ez hêvî dikim ku ev konferans perspektîfa konfederalîzma demokratîk di şert û mercên îro de nîqaş bike û rêyên diyarkirî yên çareseriya demokratîk derxîne holê. Paşeroja Rojhilata Navîn ne di şerên nû û pêwendiyên nû yên desthilatdariyê de ye, di avakirina civaka demokratîk de ye. Rizgarî di yekitiya azad a gelan de û xurtkirina siyaseta demokratîk de ye.
Divê siyaset bikeve şûna çekan, hiqûq bikeve şûna bêbaweriyê, û wekhevî bikeve şûna înkarê. Rêya aştiya mayînde ev e. Ez konferansa we careke din, bi baweriya xwe ya ji bo aştî û azadiyê silav dikim.
Abdullah Ocalan
Îmrali”
