TEV-DEMê peymana di navbera QSD û hikumeta demkî ya Sûriyeyê de wek gaveke girîng ber bi îstiqrar û rawestandina şer ve nirxand. Di daxuyaniyê de peyman wekî, “Lihevkirin destpêka pêvajoyeke nû ya têkoşîna siyasî ya ji bo sepandina mafên gelan e” hate pênasekirin. Di daxuyaniyê de bi boneya piştgiriya Rojava gelê Kurd hat silavkirin û spasî ji dostên Kurdan re hate kirin.
Tevgera Civaka Demokratîk (TEV-DEM) têkildarî lihevkirina di navbera Hêzên Sûriyeya Demokratîk (QSD) û hikumeta demkî ya Sûriyê de daxuyaniyek nivîskî weşand. Di daxuyaniyê de lihevkirin wek “destpêka pêvajoyeke nû ya têkoşîna siyasî ji bo sepandina mafên gelan” hat nirxandin. Di daxuyaniyê de wiha hate gotin: “Em vê peymanê wekî gaveke girîng ber bi istîkrar, rawestandina şer û vekirina deriyê çareseriya siyasî ya li ser esasê diyalog û lihevhatinek dûrî şer dibînin.
‘Divê mafên hemû pêkhateyan bên misogerkirin’
Di daxuyaniyê de hate gotin ku divê her çareseriyeke siyasî ya cidî mafên di serî de gelê Kurd û hemû pêkhateyên Sûriyeyê misoger bike. Di daxuyaniyê de ev tişt hatin gotin: “Gelên li Sûriyê bi dehan salan e ji ber paşguhkirin û înkarê êş kişandine. Divê mafên ve cudahiyan teva bên mîsogerkirin.”
‘Baweriya me bi hêza me ya siyasî û leşkerî heye’
Di daxuyaniyê de piştgiriya peymanê hate kirin û wiha hate gotin: “Rêveberiya me ji destpêka şoreşê ve gelê me û destkeftiyên me parastin. Em di wê baweriyê de ne ku çareserî divê sûriyeyî-sûriyeyî, li ser esasê rêzdariya li hemberî hev pêk bê. Divê çareserî li ser bingeha rêzdariya li hember taybetmendiyan, mîsogerkirina mafên gelê me be. Têkoşîna me nîşan daye ku li ser vê erdnîgariyê dikare aştiya navxweyî biparêze û li hember terorê bisekine.”
Serketina peymanê girêdayî pêkanînê ye
Di daxuyaniyê de hat destnîşankirin ku serxistina peymanê girêdayî asta pabendbûna aliyan bi pêkanîna bendên wê ye û hate gotin: “Divê bi rihê tevkarî, berpirsyarî, misogerkirina ku Hêzên Sûriya Demokratîk zerar nebîne lihevkirin pêk were. Ji ber ku HSDê destkeftiyek nîştimanî ye, roleke diyarker di têkbirina DAIŞê de û di parastina ezmûna demokratîk a ku bi xwîn û qurbaniyên mezin hatiye damezirandin de lîstiye.”
‘Gelê Kurd hemû qad vegerandin qada parastina Rojava’
Di dawiya daxuyaniyê de bang li gel û hêzên siyasî û civakî hat kirin ku bi zanebûn û berpirsyarî piştgiriyê bidi peymanê. di daxuyaniyê de wiha hate gotin: “Aştiya navxweyî biparêzin û hemû hewldanên provokatîk red bikin. Ji bo siberojeke demokratîk, bi rûmet, edalet û azadiyê ji tevahî Sûriyeyiyan, bi taybetî gelê me yê berxwedêr re bîne, kar bikin. Di heman demê de em spasiya gelê me li çar aliyên Kurdistanê û cîhanê dikin ku tevahî qad veguherandinê qadên parastin û piştgiriya destkeftiyên Rojava. Em helwesta piştevan a partî, hêzên Kurdistanî û kesayetên siyasî û dewletên ku piştgirî dan çareseriyên aştiyane û bûn sedema vê peymanê silav dikin.”
