Senatorê Partiya Komarparêzan Lindsey Graham êrişên çeteyên HTŞ û Tirkiyeyê yên li ser Rojava rexne kir û tifaqa Şamê ya bi Tirkiyeyê her roj zêdetir dibe sedema fikaran.
Êrişên çeteyên HTŞê û Tirkiyeyê di qada navneteweyî de dibe sedema bertekan. Senatorê Partiya Komarparêzan Lindsey Graham ku ji bo hevdîtinên dîplomatîk li Îsraîlê ye derbarê êrişên li ser Kurdan de daxuyaniyek da. Di daxuyaniya li ser hesabên fermî yên Qesra Spî jî hate weşandin de Graham anî ziman ku ji ber êrişên li ser Kurdan gelek nerazî ne.
Graham têkoşîna Rêveberiya Xweser a Bakur Rojhilatê Sûriyê li dijî DAIŞê bi bîr xist û wiha got: “Wekî min berî niha jî anîbûn ziman êrişên li dijî hevpeymanên me yên ji Yemenê heta Sûriyê têkoşîna herî baş li dijî DAIŞê dayîn sedema fikarên mezin e. Bi taybetî hevkariya ji bo meşandina van êrişan di navbera Hikûmeta Nû ya Sûriyê û Tirkiyeyê de pêk tê, fikarên me zêdetir dike.”
‘Vegera DAIŞê ji bo ewlehiya neteweyî xetere ye’
Li ser potansiyela DAIŞê jî Graham bi bîr xist ku niha 9 hezar girtiyên DAÎŞê ji hêla hêzên Kurd ve di bin kontrolê de tên girtin û ev yek anî ziman: “Vegera van girtiyan a qada şer ji bo ewlehiya neteweyî ya Amerîkayê xeteriyek jiyanî ye. Ez piştgirî didim ku şansek ji bo Hikûmeta Sûriyê ya Nû bê dayîn bes bi piştgiriya Tirkiyeyê êrişkirina Kurdan dê rewşek gelek cuda derxe holê.”
Graham da zanîn ku Partiya Demokrat û Partiya Komarparêz li dijî van êrişan e û wiha domand: “Ne ez ne jî hempîşeyek min nafikire ku di vê rewşê de li şûna Kurdan, Hikûmeta Sûriyê ya Nû an jî Tirkiye bikaribe girtiyên DAIŞê di bin kontrolê de bigire. Ku kesek an jî derdorek wiha bifikire hingê xwe dixapîne.”
Senator Kennedy: Kurd nebûna DAIŞ niha li cihê xwe bû
Senatorek din ê Partiya Komarparêzan John Kennedy jî Kurd wekî dostên Dewletên Yekbûyî yên Amerîkayê pênase kir û polîtîkayên Tirkiyeyê yên derbarê Rojava de rexne kir. Kennedey bi bîr xist ku rola Kurdan a di têkbirina DAIŞê de di asta jiyanî de ye û wiha got: “Ku Kurd nebûna DAIŞ niha hê jî li cihê xwe bû.”
