Wan– Endamê Sekreteryaya Însiyatîfa Yekîtiya Demokratîk Omer Şaybak, li ser guherînên li Rojhilata Navîn û rola yekîtiya Kurdan anî ziman ku nexşerêyeke nû li herêmê tê xêzkirin û got: “Di dîrokê de tu miletê ku yekîtiya xwe ava nekiriye, nebûye xwedî statu. Îro ji bo me yekîtî wekî nan, av û şertê îmanê ferz e.”
Li Rojhilata Navîn piştî hilweşîna Rejîma Baasê ya Esed li Sûriyeyê, pêvajoyeke nû dest pê kir û geşedandên gelek girîng diqewimin. Helbet di nava van geşedanan de jî Kurdistan hem weke erdnîgarî hem jî weke siyaset cîhekî girîng digire û bi hemû dezavantajan jî Kurd li ser maseyê ne. Di van rojên dîrokî de mijara herî zêde tê nîqaşkirin jî yekitiya neteweyî ya Kurdan e. Sed sal zêdetir e Kurd parçebûyî ne û yekitiyeke neteweyî nekarîne ava bikin. Li gel geşedanên metirsîdar û girîng xelasbûn yekitî jî be bi awayeke şênber nayê pêkanîn, alî tenê bi daxuyaniyan sînordar dimînin.
Endamê Sekreteryaya Înîsiyatîfa Yekîtiya Demokratîk Omer Şaybak ji bo ajansa me geşedanên lezgîn ên li Rojhilata Navîn, aloziya li herêmê û hewldanên ji bo yekîtiya neteweyî ya Kurd nirxand.
‘Li Rojhilata Navîn serdemeke nû dest pê dike’
Omer Şaybak da zanîn ku bi dînamîkên nû, veguhertinên li herêmê ve pêvajoyeke nû li pêş e û wiha got: “Di sedsala nû de qonaxeke nû li Rojhilata Navîn dest pê dike. Bûyer bi lezeke wisa diguherin ku kesî pêşbînî nedikir û guherînên kûr rû didin. Dibe ku sînorên gelek dewletan ji nû ve bên diyarkirin û nexşeyeke nû li Rojhilata Navîn bê avakirin. Di vê rewşê de ji bo Kurdan û tevahiya gelên bindest derfetên dîrokî derdikevin holê. Heke Kurd yekîtiya xwe pêk bînin, dê karibin li ser vê maseyê bibin xwedî biryar û cihê xwe bigirin.”
‘Nexweşî nebûna statuyê ye, derman jî yekitî ye’
Omer Şaybak bal kişand ser berdêlên giran ên ku gelê Kurd dane û pêwîstiya misogerkirina statuyê û ev yek got: “Gelê Kurd tevî hemû berdêlên giran ên di sedsala dawî de dane, heta îro têkoşîna xwe domandiye. Nêrîn, bîrdozî û baweriya wî çi dibe bila bibe, îro her Kurdek sedema bingehîn a pirsgirêkan dizane. Nexweşiya me nebûna statuyê ye, dermanê vê nexweşiyê jî yekitî ye. Heta ku yekitî çênebe statu pêk nayê, heta statu nebe mirov nikare di asta navneteweyî de maf û daxwazên xwe bide qebûlkirin.”
‘Înîsiyatîfa Yekîtiya Demokratîk sîwana hemû pêkhateyan e’
Derbarê armanc û pêkhateya Înîsiyatîfa Yekîtiya Demokratîk de Omer Şaybak çend agahî parve kirin û wiha pê de çû: “Ji bo bersivdayîna vê pêwîstiya dîrokî, me sîwaneke wisa ava kir ku hemû nêrînên siyasî, bawerî û partiyan, di bin banê xwe de kom bike. Înîsiyatîfa Yekîtiya Demokratîk ji 301 kesan pêk tê. Ji sedî 60ê delegeyan kesên serbixwe ne û ji sedî 40 jî ji nûnerên sazî û partiyên siyasî pêk tên. Mebesta me ew e ku li ser vê xakê jiyaneke wekhev û di nava aştiyê de were avakirin û rê li ber rijandina xwînê were girtin.”
‘Ji bo statuyê yekitî pêwîstiyeke jêneveger e’
Di dawiya axaftina xwe de Omer Şaybak polîtîkayên desthilatdaran û astengiyên li hemberî yekîtiyê rexne kir û wiha derbirî: “Hêzên serdest ji bo ku gelên bindest nebin yek û nebin xwedî vîn û statu, bi her awayî hewl didin perçebûnê kûr bikin. Carinan bi derfetên maddî, carinan bi pêşkêşkirina meqaman û carinan jî bi zext, gef û girtinan rê li ber yekîtiyê digirin. Dewlet mafê tu kesî bixweber nadin, divê mirov hêza xwe ya rêxistinkirî ava bike. Ji ber vê yekê, yekîtî ji bo hemû Kurdan wekî nan û avê, wekî pêwîstiyeke jiyanî ye. Banga me ji bo tevahiya alîgirên aştî û azadiyê ew e ku li vê înîsiyatîfê xwedî derkevin û tê de cih bigirin.”
