Rêveberê Navenda Neteweyî ya Dijî Terorê ya DYAyê Joseph Kent ê ku îsîtfa kir êrîşên li ser Îranê rexne kir û diyar kir ku DYA El Qaîde û DAIŞê wekî hêzên wekîl li Sûriyê bi kar aniye.
Rêveberê Navenda Neteweyî ya Dijî Terorê ya DYAyê Joseph Kent ê ku ji peywira xwe îstifa kir, bû mêvanê weşana YouTube ya Scott Hortonê. Kent ê ku di heman demê de sîxurekî berê yê CIAyê bû, li ber kamerayan li xwe mikurhat ku wan El Qaîde û DAIŞê wekî hêzên wekîl li Sûriyê bi kar aniye û got: “Li hundirê Sûriyeyê wekî hêzek wekîl me xwe dispart kê? Bi piranî Sunnî û hêmanên Sunnî yên herî radîkal. Artêşa Azad a Sûriyê hebû; lê yên ku bi rastî li ser erdê çalak bûn û li dijî rejîma Beşar Esed herî êrîşkar endamên El Qaîde û DAIŞê bûn.”
Kent di weşana zindî de got: “Dema ku em di sala 2011an de ji Iraqê vekişiyan, eşkere bû ku me Bexda radestî Îraniyan kiribû. Lobiya Îsraîlê pirsgirêkek mezin bû ji ber ku me di bingeh de rêyeke super a Îranî hebû, pireke bejahî ku ji Îranê di nav Iraqê re heta Sûriyeyê dirêj dibû. Ev rasterast piştgiriya çalakiyên Hizbullahê li dijî Îsraîlê dikir. Ji ber vê yekê ev pirsgirêkek mezin bû. Bi vî awayî, me hevsengiya hêzê li herêmê ber bi Şîeyan ve guherand. Piştre şerê qirêj li Sûriyeyê dest pê kir; ji ber ku Hafiz Esad û Beşar Esad her dem hevalbendên Îranê yên demdirêj bûn, piştgiriya Îranê dikirin û bi rêya Sûriyeyê piştgirî didan Hizbullah û Hamasê. Ji ber vê yekê li hundirê Sûriyeyê wekî hêzek wekîl me xwe dispart kê? Bi piranî sûnî yên herî radîkal. Artêşa Azad a Sûriyeyê û hin kesên bi navê ‘nerm’ hebûn; lê yên ku bi rastî li qadê çalak bûn û li dijî rejîma Beşar Esad herî êrîşkar bûn endamên El-Qaîdeyê û paşê endamên DAIŞê bûn. DAIŞ ewqas ji kontrolê derket ku di dawiyê de em neçar man ku vegerin Iraq û Sûriyeyê; ji bo xîlafeta DAIŞê ji holê rakin, me gelek ji heman milîsên Şîe yên ku me berê hewl dida hêza wan kêm bikin, ji nû ve bi hêz kir. Min bi xwe hevjîna xwe di şerê li dijî xîlafeta DAIŞê de winda kir.”
