Rêveberên DEM Partiyê û Dayikên Aştiyê yên Geverê diyar kirin ku bî aştî û diyalogê çareserî pêk tê û wiha gotin: “Divê komployên li dijî Rêber Apo û gelê Kurd bi dawî be.”
Komploya navnetewî ya ku li dijî Rêberê Gelê Kurd Abdullah Ocalan hatiye pêkanîn di sala xwe ya 27emîn de ye. Komplo, birêvebirin û bi encamên komployê hêj jî di rojeva Kurdan û cîhanê de ye. Reveberên DEM Partiyê û Dayikên Aştiyê yên Geverê di salvegera koployê de ji ajansa me re axivîn.
‘Pirsgirêk bi aştî û muzakereyê çareser dibin’
Rêveberê DEM Partiya Geverê Mesut Elyakut, destnîşan kir ku hêza hegemonîk yên komploger hêj jî komployên xwe li ser Rêber Abdullah Ocalan û gelê Kurd didomînin. Mesût Elyakut diyar kir ku pirsgirêka Kurd tenê bi aştî û muzakereyan tê çareserkirin û wiha got: “Ez mînaka dewleta Brîtanyayê bidim. Serokwezîrê berê yê Brîtanyayê Winston Churchill dibêje, “Divê her dem di Rojhilata Navîn de Kurd brîndar bimînin.” Anku bila Kurd tu carî negijin mafê xwe, bila statuya wan nebe.”
‘Îro tişta herî girîng yekitî ye’
Di berdewama axaftina xwe de Mesût Elyakut erîşên li ser Rojava tên domandin wekî berdewama komloya 15ê Sibatê nirxwand û got: “Li ser paradîgmaya Rêber Apo heye. Îro tişta herî girîng Yekitiya Kurda ye. Serokatî gelek caran ser wê mijarê sekiniye. Herwiha peyam ji Barzanî re şand. Lê mixabin peyama wî pêk nehat. Heta azadiya rêzdar Ocalan pêk neyê em ê têkoşîna xwe berdewam bikin.”
‘Pêvajo dê bi hevkariya gelên Kurd û Tirk pêş bikeve’
Hevserokê DEM Partiya Geverê Abdullah Kirmizigul komploya navneteweyî ya li dijî gelê Kurd û Rêberê Gelê Kurd Abdullah Ocalan hatiye meşandin şermezar kir û got: “Dewletê bi wî awayî, pêşî li zimanê Kurdî girt û hêza kurdewarî şikand. Rêber Apo di 1993an de diyar kir ku divê li Rojhilata Navîn azadî, aştî, xwişk biratî pêk were. Lê belê tu dewlet an kes têkildarî vê yekê bersiv nedan. Ji 1993an heta niha muxatabek peyda nebû. Dewletên mêtinger jî her dixwazin kuştin nava gelê Kurd û Tirk de hebe. Ev pêvajo pêvajoya aştiyê ye û pêwîste gelê Kurd û Gelê Tirk dest bide hev. Ew pêvajo ji bo azadî were pêkanîn hat destpêkirin lê belê heya niha tu gavên şênber nehatine avêtin.”
Banga meşê
Mesût Kirmizigul banga tevlibûna meşa meşa îro tê lidarxistin kir û wiha got: “Li dijî komploya ser rêzdar Abdulalh Ocalan hatiye pêkanîn em ê saet 18.00an bimeşin. Bangavaziya me ji gelê Geverê, esnaf û xebatkaran ew e ku bila tevlî meşê bibin.”
‘Em komployê şermezar dikin’
Dayika Aştiyê Amîne Engûdar got ku 15ê Sibatê ji bo gelê Kurd roja şermezarkirinê ye û wiha axivî: “Em komploya navneteweyî û hêzên ku beşdar bûne şermezar dikin. Em dixwazin ku şertên azadiyê bêne çêkirin.”
‘Divê komplo bi dawî bin’
Dayika Aştiyê Gulbeyaz Mihçi bal kişand ser girîngiya aştiyê û diyar kir ku gel ji bo pêvajoya çareseriyê hêvîdar e. Gulbeyaz Mihçi da zanîn ku berdewamkirina komployan, pêvajoya aştiyê asteng dike û xwest komplo bi dawî bibe.
Dayika Aştiyê Gule Polat jî di got ku gel dixwaze şer bi dawî bibe, şertên aştiyê werin pêkanîn û wiha got: Em dixwazin xwîn nerije û aştî pêk were.”
‘Zarokên Kurdan reş dikin û qetil dikin’
Dayika Aştiyê Emîne Atak jî diyar kir ku gelê Kurd dê li hember êrişan li ber xwe bide û ev tişt gotin: “Bang li gel dikim ku bila ji bo aştiyê û mafên xwe, dengê xwe bilind bikin. Dewleta Tirk zarokên Kurd yên di wargehan de bêyî dê û bav mezin dibin ji raya giştî re wek ‘xirab in’ dide nîşandan û bi vê yekê qetilkirina Kurdan rewa dike. Em sibê li dijî wan xwînxaran derkevin û li qadê tevlî meşê bibin.”
