Şêniyên bajarê Serêkaniyê yê Rojava ku ji ber êrişên dewleta Tirk neçar mabûn warê xwe biterikînin, piştî heft salên dijwar ên koçberiyê dest bi vegera li ser xaka xwe kirin. Karwana destpêkê ya ku ji 410 malbatan pêk tê, bi armanca vegera li malên xwe ji bajarê Hesekê bi rê ket.
Wekî ku tê zanîn, ji vir heft sal berê, di 9ê Cotmeha sala 2019an de ji ber êrîşên dewleta Tirk û komên girêdayî wê yên li ser herêmê, bi dehhezaran şêniyên Serêkaniyê û gundewarên wê neçar mabûn ku dest ji cih û warên xwe berdin. Ev malbat bi piranî li kampên derdora Hesekê wekî Kampa Waşokanî û Kampa Serêkaniyê û bajaran bi cih bûbûn, di nav şertên giran de jiyana xwe didomandin.
Koma ewil ji 410 malbatan pêk tê
Piştî jiyana heft salan a di bin şert û mercên zehmet ên koçberiyê û kampan de, amadekariyên ji bo vegerê bi dawî bûn. Di çarçoveya van amadekariyan de, koma yekem a koçberan ku ji 410 malbatan pêk tê, îro ji Hesekê ber bi Serêkaniyê ve bi rê ket.
Tê payîn ku veger qonax bi qonax berdewam bike
Piştî gihiştin û bicihbûna koma yekem, tê çaverêkirin ku malbatên din ên koçber jî di pêvajoya pêşiya me de qonax bi qonax vegerin warên xwe. Armanca sereke ew e ku şêniyên resen ên herêmê vegerin malên xwe û jiyana sivîl li bajarê Serêkaniyê ji nû ve bê avakirin. Derketina vê karwanê, di nav koçberên din ên li Hesekê û herêmên din de jî kelecaneke mezin çêkiriye.
