Amed – Cîgirê Hevserokên Rêxistina DEM Partiyê ya Amedê Celal Alphan tekildarî civînên gel diyar kir ku ew bi rêya civînên gel, pêvajoyê bi gel re parve dikin û bi hevre li ser pêvajoyê niqaş dikin.
Ji bo ku banga Rêberê Gelê Kurd Abdullah Ocalan di nava gel de baş bê femkirin partiyên siyasî û saziyên civakî li tax û gundan civînên gel li dar dixin. Partiya Wekhevî û Demokrasiyê ya Gelan (DEM Partî), Tevgera Jinen Azad (TJA) û Partiya Herêmên Demokratîk li Amedê her roj li gund û taxên navend û navçeyên Amedê “Civîna Gel” li dar dixin. Cîgirê Hevserokên Rêxistina DEM Partiyê ya Amedê Celal Alphan derbarê “Civînên Gel” re ji Ajansa Welat (AW) re axivî.
‘Em pêvajoyê bi gel re parve dikin’
Celal Alphan destnîşan kir ku piştî banga Rêberê Gelê Kurd Abdullah Ocalan pêvajo hat destpêkirin. Celal Alphan, da zanîn ku ji bo pêvajo baş bê femkirin wan dest bi civînên gel kirin û wiha axivî: “Ji bo ku em nerînên gel, rexne û pêşniyarên gel bistînin, em bi gel re vê pêvajoyê niqaş dikin. Civîn ji aliyê gel ve bi coş tên pêşwazî kirin. Em her roj li tax û gundan civînan pêk tînin. Di van civînan de roj bi roj tevlêbûna gel zêde dibe. Ji gundên herî dûr, biçûk û heta navêndên bajêr em li her gund û taxan civînên gel li dar dixin. Pirsên ku welatî ji me dipirsin em dibersivînin. Me di serî de 200 civîn danîbû pêşiya xwe. Lê em ê hejmara wan civînan zêdetir bikin. Heta îro me 30 civîn pêkaniye. Em pêvajoyê bi gel re parve dikin û der barê geşedanên nû de agahiyan didin gel.”
‘Gel bi xwe, rêxistina xwe û Serokê xwe bawer e’
Celal Alphan bi bîr xist ku gelê Kurd ev 50 sal in ji xwe di nava pêvajoyê de ye û ew tişt anî ziman: “Gelê Kurd pêvajoyê dibîne, dizanê û dipejirîne. Di civînan de gel zêde pirsan dipirsin û nakokiyên di serê xwe de parve dikin. Dîwan hewl dide bibe bersîva gel. Em bi gelê xwe re di nava parvekirinê de ne. Gel dixwazê hîn bibe. Her çiqas heta îro tu gav nehatibê avêtin jî, gel pêvajoyê baş pêşwazî dike. Gel bi xwe, rêxistina xwe û Serokê xwe bawer e. Û bi wî şeklî nêzî civînan dibe. Gel tiştên ku ji aliyê Birêz Abdullah Ocalan ve hatine gotin erenî dibîne.”
‘Em civakê ji bo pêvajoyê amade dikin’
Celal Alphan diyar kir ku li her derê Kurdistanê, bi her beşên civakê re di nava danûstandinê de ne û wiha got: “Gel îro li benda gavên erenî ye. Di pêşerojê de ji aliyê dewletê ve ew gav bên avêtin gel jî dê baştir nêzî pêvajoyê bibe. Em civaka xwe ji bo pêvajoyê amade dikin. Ji bo gav bêne avêtin em ê di nava xebatan de bin.”
‘Gel li benda nêzikatiya dewletê ye’
Celal Alphan anî ziman ku Gelê Kurd ne dûrî komunan e û wiha pê de çû: “Gelê Kurd ji xwe bi salan ne wekî komunan dijî. Ji bo vê îro komunan erenî dibîne. Ji bo wê komunan pêjirandiye û qebûl kiriye. Gel li benda nêzikatiya dewletê ye. Gelê Kurd bi her awayî amade ye.”
‘Divê gel bêtir xwe tev li pêvajoyê bike’
Celal Alphan xwest ku hemû welatî pirsên di serê xwe de parve bikin û zêdetir tev li civînan bibin. Celal Alphan diyar kir ku ew her roj li qadanin û axaftina xwe wiha dawî kir: “Em ji her rewşê re amade ne. Em dizanin ku keda her kesî di nava aştiyê de ye. Aştiyek aramî werê dê her kes hembez bike. Ji bo pêvajo bi ser bikeve divê gel alîkariyê bide me.”
