Enqere – Hevserokê Meclîsa Giştî ya taxên Şêxmeqsud û Eşrefiyê Nûrî Şêxo diyar diyar kir ku êrişên li ser taxan bi piştgirî û alîkariya Tirkiyeyê dest pê kiriye û got: “Armanca êrişan; valakirin û dagirkirina taxan e. Ji bo em taxên xwe ji nava dorpêç û êrişan derxin, hevdîtinên me didomin.”
Komên paramîlîter ên giredayî Tirkiyeyê û hezên HTŞê di 27ê Kanûnê de êrişî taxên Şêxmeqsûd, Eşrefiyê û Benîzed ên giredayî Helebê kir. Her sê tax hatin dorpeçkirin û 5 seatan bê navber bi çekên giran, tang û topan êrişên li ser taxan berdewam kir. Piştî hezên koalîsyonê ketin navberê, êrişên li ser taxan rawestiyan. Her çiqas êrişên li ser taxan rawestiyabin jî dorpêça li ser taxên Şêxmeqsûd û Eşrefiyê berdewam dike û ceyrana taxan jî hatiye qutkirin. Hevserokê Meclîsa Giştî ya taxên Şêxmeqsud û Eşrefiyê Nûrî Şêxo ku ji Ajansa Welat re axivî û diyar kir ku armanca êrişan valakirina taxan e û ji bo rabûna dorpêçê hevdîtinên wan berdewam dikin.
‘Bi tang û topan êriş dikin’
Nûrî Şêxo anî ziman ku armanca êrişan dagirkirina taxan e û wiha got: “Taxên Helebê Şêx Meqsûd, Eşrefiyê û Benîzed ku pêkhateyên wan piraniya wan Kurd in û di nav de kêm be jî Ereb û pêkhateyên din jî hene bi awayekî hovane tên bombebaran kirin. Armanc dagirkirina van taxan e. Bi vî awayî dixwazin Kurdan ji Halebê derxînin. Ev êriş bi piştgirî û alîkariya Tirkiyeyê destpêkir. Çeteyên derdorê her sê taxan dorpêçkirinê bi çekên kirin, tang û topan êriş dikin. Dest bi êrişeke mezin kirin. Destê medyaya hikûmeta Şamê û MÎTa Tirk jî di nav van êrişan de heye. Êrişeke mezin ku 5 seatan dom kir pêk hat. Xwestin komkujiyeke mezin derxînin li dijî 5 hezar mirovan şerek dan destpêkirin. Me nexwest bi şer me xwest bi diyalogê çareseriyeke bibînin. Gelê Şêxmeqsûd, Eşrefiyê û Benîzed, hêza asayişê parastina taxan kirin. 25 welatiyên taxê birîndar bûn û jinekekê jî jiyana xwe ji dest da.”
‘Em nikarin di hevdîtinan de bigihîjin encamekê’
Nûrî Şêxo bi lêv kir ku hikûmeta Şamê li gorî sozên dide tevnagere û wiha axivî: “Piştî êrişan ji bo rawestandina êrişan hevdîtin jî pêk hat. Hêza garantor weke Amerîka, Fransa û dewletên Ereb ketin nava hewldanê ku şer bisekenîn. Di encamê de şer sekinî. Hikûmeta Şamê lewaz û bê îrade ye. Ji koman pêk hatiye. Ji bo wê jî em ne bawerin çareseriyeke bibînin. Rejîmeke olperest Sûriye bi rê ve dibe, desthilat û zilimkar e. Ji bo wê em nikarin di hevdîtinan de bigihîjin encamekê. Soz tên dayîn, êre dikin lê di pratîkê de berovajî wê tevdigerin û êriş dikin.”
‘Gefan li gel dixwin ku gel taxan vala bike’
Nûrî Şêxo destnîşan kir ku hikûmeta demkî ya Şamê zêdetirî 5 mehan e amadekariya êrişan kiriye û got: “Rêyên taxan girtin. Her 3 tax kirin dorpêçê û deriyên taxan jî bi keviran girtin. Ev jî nîşan dide ku pirsgirêkan bi êrişan dixwazin li gorî xwe çareser bikin, ne bi diyalogê. Hikûmeta demkî ya Şamê dixwaze taxên Kurdan vala bikin. Bi şer nikarin vala bikin û niha jî dixwazin tirsê di nava gel de çêbikin û bi tirsê taxan vala bikin. Gefan li gel dixwin ku gel taxan vala bike. Derdorê Şêxmeqsûd û Eşrefiyê 2 taxên Suryanan hene. Ew her du tax di bin kontrola hikumeta Şamê de ye. Welatiyên li wan taxan ji malan derxistine û ji wan re gotine ji ber êrişan xetere heye. Lê di rastiyê de ne wisa ye. Di rastiyê de planeke qirêj heye. Di dîmenan de jî derket holê ku ketine hundirê malên wan û tiştên wan dizîne.”
‘Divê hemû Kurd bibin dengê Şêxmeqsûd û Eşrefiyê’
Nûrî Şêxo diyar kir ku taxên Kurdan di nava dorpêçe de ne û gel nikare bigihîje pêdiviyên bingehîn. Nûrî Şêxo ji bo zext li hikûmeta Şamê bê kirin jî xwest hemû Kurd xwedî li Şêxmeqsûd û Eşrefiyê derbikevin û wiha got: “Gelê Şêxmeqsûd û Eşrefiyê xwedî îrade û fikra azad e. Li ser vê esasê xwe rêxistin kiriye. Bi rojane di nava parastina rewa de ye. Di şer de jî gel û asayîş bû yek û ev êriş şikandin. Nikarin tu tiştekî jî bi dest bixînin. Ev gelê berxwedêr nehişt ku ew bigihîjin armanca xwe ya dagirkirina taxan. Dê tu car nikaribin bigihîjin armancê. Ev her tim bi wahşet êrişî gelên herêmê dikin. Bi êrişan nikarin lê niha bi êrişeke din ji xwarin, vexwarinê bigire heta sotomenî û kahrebeyê, asteng dikin. Niha kahrebeyê qut kirin e û derfet kêm in. Her tişt li ser taxan hatiye qutkirin. Lê gelê me li dijî vê yekê li ber xwe dide. Ji bo komkujiyeke mezin pêk neyê û pirsgirêkên Sûriyeyê bi diyalog û demokrasiyê bê çareserkirin. Divê hemû Kurd bibin dengê Şêxmeqsûd û Eşrefiyê.”
‘Bi destê Tirkiyeyê ew êriş pêk tên’
Nûrî Şêxo anî ziman ku ji bo çareseriya pirsgirêkê hevdîtinên wan bi hikumeta Şamê re berdewam dikin û wiha got: “Dewletên garantor weke Amerîka û Fransa ji bo agirbest pêk were û şer nedome ketin nava hewldanê. Rêveberiya Xweser û rêveberiyên taxan jî di nava hevdîtinan de ne. Lê îradeya hikûmeta Şamê tune ye. Lê Heleb jî ne weke Şamê ye. Heleb piranî di bin kontrola Tikiyeyê de ye. Ew talîmatê didin wan komên çete. Ji bo em çareseriyeke bibînin û şer neqewime hewldanên me me didomin. Ji bo em bi rêya dewletên navneteweyî jî zextan bikin jî hewldanên me hene. Tirkiye li Helebê bi bandor e û bi destê Tirkiyeyê ev êriş pêk tên. Ji bo em her sê taxan ji nav dorpêçê derxin, hevdîtinên me didomin.”
