Di pêşengtiya MEBYA-DERa Êlihê de bi boneya salvegera hefteya lehengiyê serdana gorên kesên ku di têkoşîna azadiya Kurd de jiyana xwe dest dane hate kirin.
Bi pêşengtiya Komeleya Piştevanî û Alîkariyê ya Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Êlihê bi boneya salvegera hefteya lehengiyê serdana gorên kesên ku di têkoşîna azadiya Kurd de jiyana xwe ji dest dane kirin. Di serdana goristanan de endam û rêveberên DBPê û DEM Partiyê, Hevşaredarê Êlihê Yeşîl Işik, TUAY-DER, Komeleya Alimên Olî ya Êlihê, Komeleya Dayîkên Aştiyê, TJA û gelek kes amade bûn. Girseya ku ber bi goristanê ve meşiya, dirûşma “Şehîd Namirin” berz kirin. Pişt re ji bo kesên ku di têkoşîna azadiya Kurd de jiyana xwe ji dest dane deqîqeyek rêz hate girtin û pîştî rêzgirtinê dirûşma “Şehîd Namirin” hate berzkirin.
‘Hevalê Egîd li çiyayên Kurdistanê bû bersiv’
Hevserokê MEBYA-DERa Êlihê Şafî Aratemûr li ser goristanê li ser navê saziyê axivî û got: “Hevalê Mazlûm di 21ê Adarê de li Zindana Amedê bi 3 darikên şiqatê agirê Newrozê vêxist û peyam da gelê Kurd. Ji Kawayê Hesinkar heta bigihe Mazlûm Dogan, Rahşan, Zekiye û hemû hevalên me yên cangorî yên din heta Kurdistaneke azad neyê avakirin, dê ev agir bidome. Hevalê Mazlûm Dogan pêşengtiya rizgariya gelê Kurd û pêşengekî Tevgera Azadiya Kurd bû. Hevalekî gelek qedir bilind û cihê wî gelek bilind bû. Ji ber vê yekê wî peyameke wisa da çiyayên Kurdistanê jî. Hevalê Egîd li Çiyayên Kurdistanê bû bersiv û got; ‘Ev gel dê tu carî ji paragdîgmaya Rêber Apo bi paş ve gavê neavêje.’ Ew ê ev têkoşîn heta ku bigihe armancê dê berdewam bike. Em bejna xwe li ber hemû şehîdên Kurd û Kurdistanê ditewînin û hemû lehengên Kurdistanê di dilê me de rêber in. Şehîd namirin.”
‘Em bi saya şehîdan gihiştine îro’
Piştre Hevseroka MEBYA-DERê ya Êlihê Nezahat Toprak jî axivî û got: “Em hemû şehîdên Kurdistanê bi rêzdarî bi bîr tînin û bejna xwe li ber têkoşîna wan ditewînin. Dema ku em tên li vir em di hizûra şehîdan de gelek hestiyar dibin. Merheleya ku îro em gihiştinê bi xwîna şehîdên me ne. Îro ev zimanê ku em diaxivin, ew jî bi saya serê şehîdên me ne. Wekî ku tê zanîn rêzdar Ocalan pêvajoyekê daye destpêkirin. Piştî ku ev pêvajo hate despêkirin di Rojhilata Navîn û li hemû cîhanê de statuya gelê Kurd tê nîqaşkirin. Şehîd namirin.”
‘Şehîdên welatê xwe ne’
Herî dawî Hevseroka Komeleya Alimên Olî ya Êlihê Sabahat Acar jî wiha got: “Şehîd namirin, em wan mirî nahesibînin. Ew mêvanê rebê xwe ne û li cem rebê xwe pir bi qîmet in. Ew jî îkrameke ku xwedê teala ye ku daye wan û ji wan hez dike. Şehîdên me yên welatê xwe û yên dînê xwe ne.”
Bername bi gotina kilamên li ser cangoriyan bi dawî bû.
