Bi pêşengiya ciwanên welatparêz li Wanê Komeleya Çand û Hunerê ya “Demhat” hat vekirin. Di vekirinê de hat destnîşankirin ku komele li dijî polîtîkayên asîmîlasyon û hişbirê alternatîfeke nû ye û banga xwedîderketina li ziman û çandê hat kirin.
Bi pêşengiya ciwanên Wanê yên welatparêz, Komeleya Çand û Hunerê ya bi navê “Demhat” bi bernameyeke bi coş hat vekirin. Nûnerên saziyên civaka sivîl, gelek welatî û ciwan tevlî bernameya vekirinê bûn.
Bernameya bi rêzgirtinê dest pê kir. Piştre li ser navê komîna çand û hunerê endamê Komeleya Demhat Kenan Îldenîz axivî. Îldenîz diyar kir ku parvekirina vê kelecana roja biwate ji bo wan cihê şanaziyê ye.
‘Em polîtîkayên asîmîlasyonê napejirînin’
Kenan Îldenîz bal kişand ser zext û êrişên li ser çand û nasnameya Kurdî û wiha got: “Em wekî ciwanên Kurd li hember her cure polîtîkayên bişaftin û ji nasnameyê dûrxistinê dengê xwe bilind dikin. Em daxwaza jiyana azad a çand, ziman û nasnameya xwe dikin. Îro gelê me û bi taybetî ciwan û zarok her roj bi polîtîkayên bişaftin û înkarê re rû bi rû dimînin. Pergal her roj li ser çand û hebûna me ya nasnameyî bombardimaneke bênavber pêk tîne. Em wekî ciwan dixwazin bi çand û nasnameya xwe bijîn; ev komîna me jî nîşaneya herî şênber a vê daxwazê ye. Em bi ti awayî zext û pêkûtiyên li ser van nirxan napejirînin.”
‘Demhat qadeke alternatîf e’
Kenan Îldenîz di berdewamiya axaftina xwe de bal kişand ser xetereya hişbirê di nava ciwanan de û got: “Wekî tê zanîn îro li seranserê welat di nava ciwanan de hişbir û tîryak gelekî belav bûye û bandoreke wê ya xerab li ser ciwan û gelê me çêbûye. Ji ber vê rewşê ciwan ji çand û nasnameya xwe dûr ketine. Lê êdî em dizanin ku ciwan ne bê alternatîf in. Her ciwanek dikare li hember vê neyîniyê bisekine û bi pêşxistina çand, ziman û hunera xwe dawî li vê qirêjiyê bîne. Komeleya Demhat li ser vê esasê ji bo ciwanan wekî qadeke alternatîf a jiyanê derket pêş. Em hemû ciwanan vedixwînin nav vê xebata hêja.”
Piştî axaftinê, hunermendên herêmî derketin ser dikê, stran gotin û beşdarvanan govend gerand. Bername bi coşa govendê bi dawî bû.
