Bîranîna şehîdên Tevgera Azadiyê yên ku di dem û cihên cuda de jiyana xwe ji dest dane, li Şirnex û navçeyên wê bi serdana girseyî didomin.
Li navenda Şirnexê û navçeyên Silopya, Elkê, Hezex û Qilebanê bi pêşengtiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Şirnexê ji bo şehîdên Tevgera Azadiyê yên ku di dem û cihên cuda de jiyana xwe ji dest dane bernameya bîranînê tê lidarxistin. Bîranîn di roja duyemîn de berdewam dikin. Bi hezaran welatî serdana bîranînan dikin.
Şirnex
Li navenda Şirnexê bîranîna cangoriyan li Mala Şînê ya Mehmet Emîn Acar a li taxa Yeşîlyûrtê tê lidarxistin. Bi hezaran kes tev li bernameya bîranînê bûn. Wêneyên Rêberê Gelê Kurd Abdullah Ocalan û şehîdan û pankarta “Şehîdên me rûmeta me ne” hatin daliqandin. Bi sedan welatiyên serdana bîranînê dikin bênavber dirûşma “Şehîd namirin” berz dikin. Bîranîn bi kirina dûayan berdewam dike.
Silopiya
Bernameya bîranîna ji bo cangoriyên azadiyê li Mizgefta Valî Kamîl Acûn a li Taxa Dîcleyê ya li navçeya Silopiyayê tê lidarxistin jî didome. Li cihê bîranînê wêneyê Rêberê Gelê Kurd Abdullah Ocalan, wêneyên şehîdan, pankartên “Şehîd ronahiya rêya me ne” û “Şehîd rûmeta me ne” hatin daliqandin. Dayîkên Aştiyê ku tev li bîranînê bûn nêzî cihê bîranînê kom bûn bi dirûşmên “Bijî Serok Apo” û “Şehîd namirin” heta cihê bernameya bîranînê meşiyan. Malbatên şehîdan û kesên tev li bîranînê bûyî Dayikên Aştiyê bi çepik û dirûşman pêşwazî kirin. Bernameya bîranînê bi serdanan didome.
Hezex
Li Mala Şînê ya Mizgefta Konûtan a li Taxa Atakentê jî bîranîna ji bo cangoriyên azadiyê di roja duyemîn de berdewam dike. Wêneyên cangoriyên azadiyê yên ku hatine aşkerekirin li cihê bîranînê bi gul û rengên kesk û sor û zer hatin xemilandin. Her wiha wêneyê Rêberê Gelê Kurd Abdullah Ocalan û pankartên “Şehîd ronahiya rêya me ne” û “Şehîd rûmeta me ne” hatin daliqandin. Malbatên şehîdan û gelek kes tev li bernameya bîranînê bûn. Endam û rêveberên partiyên siyasî û saziyên sivîl ên civakî di nav de gelek welatî bi awayekî girseyî serdana bîranînê dikin. Di bîranînê de her tim dirûşmên “Şehîd namirin” û “Bijî Serok Apo” tên berzkirin.
Qileban
Bîranîna ji bo cangoriyên azadiyê li Mala Şînê ya li Taxa Şantiyê ya li Gundê Roboskê yê navçeya Qilebanê tê lidarxistin jî di roja 2yemîn de berdewam dike. Li cihê bîranînê wêneyê Rêberê Gelê Kurd Abdullah Ocalan û pankartên, “Şehîd ronahiya rêya me ne” û “Şehîd rûmeta me ne” hatin daliqandin. Malbatên şehîdan jî qûrnefîl danîn ser wêneyên zarokên xwe. Bi sedan welatiyên serdana bîranînê dikin êşa malbatan parve dikin û diyar dikin ku şehîd şehîdên gemû gelê Kurd in.
Elkê
Li gundê Germavê yê navçeya Elkê jî Endama YJA-Starê Sozdar Abî (Jînda Feraşîn) di roja duyemîn de tê bibîranîn. Bîranîna ku li ber mala malbatê tê lidarxistin ji aliyê gelek welatiyan ve tê ziyaretkirin. Welatiyên ku tev li bîranînê bûn dirûşma ‘Şehîd namirin’ berz kir. Parlamenterê DEM Partiyê yê Şirnexê Mehmet Zekî Îrmez ê di bîranînê de axivî, diyar kir ku dê xwedî li mîrateya têkoşîna kesên di têkoşîna azadiyê de jiyana xwe ji dest dane derkevin û destnîşan kir ku dê têkoşîna wan mezin bikin. Bîranîn wê bi dayîna mewlîdê îro bi dawî bibe.
