Li navçeya Artukluyê cenazeyên 2 jinên ku tê texmînkirin 10 roj berê jiyana xwe ji dest dane, hatin dîtin. Her wiha li Misûriyê jî cenazeyê jinekê hate dîtin.
Li taxa Tekerê ya navçeya Artuklu ya Mêrdînê cenazeyên 2 jinan di malekê de hatin dîtin. Li gorî agahiyan; welatiyên taxê yên bêhna cenazeyan çû wan, agahî dan û li cihê bûyerê komên tenduristiyê û polîs hatin sewqkirin. Ekîb, piştî çilingaran derî vekirin têketin hundirê malê. Li malê cenazeyên Leyla Işiktaş (60) û Muatter Işiktaş (65) hatin dîtin.
Piştî lêkolîna cihê bûyerê, cenazeyên herdu jinan ji bo otopsiyê rakirin morga Nexweşxaneya Perwerde û Lêkolînê ya Mêrdînê.
Tê texmînkirin ku her du jinan 10 roj berê jiyana xwe ji dest dabin. Têkildarî bûyerê lêkolîn hate destpêkirin.
Her wiha cenazeyê Cemîle Arslanhan (60) li mala wê ya li taxa Misûriyê hat dîtin. Cenazeyê Arslanhan ji bo otopsiyê birin morga Nexweşxaneya Perwerde û Lêkolînê ya Mêrdînê.
Derbarê herdu bûyeran bê têkiliyan wan bi hev re heye yan na lêpirsîn hat destpêkirin.
