Operasyona li kampa Holê di roja duyemîn de didome. Hêzên YPJ û HSD ê di operasyonê de 16 DAIŞî girtin û gelek çek û cebilxane bi dest xistin.
Operasyona ewlehiyê ku duh Hêzên Ewlekariya Hundirîn li Kampa Holê dabû destpêkirin, di roja duyemîn de dewam dike. Operasyon bi desteka YPJ û QSD’ê pêk tê. Hêzên Ewlekariya Hundirîn da zanîn ku di operasyonên li kampê û derdora wê de, heta niha 16 DAIŞî hatin girtin. Her wiha 3 çekên kalaşnîkov, 2 demançe û gelek cebilxane jî hatine desteserkirin.
Gefên DAIŞê zêde dibin
Fermandariya Giştî ya Hêzên Ewlekariya Hundirîn duh der barê destpêkirina operasyoneke ewlehiyê li kampa Holê de daxuyanî dabû.
Hêzên Ewlekariya Hundirîn diyar kiribû ku di demên dawî de hem di warê leşkerî de hem jî di warê siyasî de, herêma wan rastî gelek pêşketin û rûdanan hat û ev agahî parve kirin: “Van pêşketinan derfet da şaneyên DAIŞê ku liv û tevgera xwe zêde bikin û kiryarên terorîstî pêk bînin, her wiha sûdê ji valahiya li hin deverên Sûriyeyê bigirin. Li ser vê bingehê, DAIŞ gelek çalakiyên terorîstî li dijî sivîlan û hêzên me yên leşkerî pêk anîn. Di heman demê de hewldana leşkerkirin û ji nû ve birêxistinkirina xwe zêde dike.
Bi deh hezaran malbatên DAIŞê li kampê ne
Kampa Holê yek ji cihên sereke ye ku rêxistina terorîst DAIŞ hewl dide xwe bigihînê. Di van demên dawîn de, li kampê hewldanên dubare yên şaneyên DAIŞê ji bo revandina malbatan çêbûn. Her wiha bi dehan rewşên gef û lêdanan li dijî şêniyên kampê hatin dîtin. Kampa Holê ya ku bi deh hezaran malbatên DAIŞê tê de dijîn, rewşeke awarte nîşan dide. Ew wek fitîla karesateke niha û pêşerojê tê dîtin, nemaze ji ber nebûna çareseriyên bingehîn ji aliyê civata navneteweyî ve ku barê giran li ser Rêveberiya Xweser dihêle. Ev yek bi taybetî piştî ku piştgiriya navneteweyî ji kampê re qut bû, rewşeke bê îstiqrar çêkir û astengî û kêşeyên mirovî û ewlehî zêde kirin.
Ji kesî nayê veşartin ku DAIŞ gelek caran hewl daye hişmendiya xwe ya tundrew di mejiyê zarok û ciwanên kampê de bi awayekî birêxistinkirî ferz bike. Her wiha navendên rêxistinên mirovî yên di nava kampê de jî rastî gelek êrişên wan hatin. Li ser vê bingehê û ji bo ku ev teror negihêje armancên xwe, hêzên me di dem û cihên cuda de li dijî şaneyên DAIŞê bi dehan operaseyonên pêşîlêgirtinê li dar xistine.
Ji bo wê, li gor prensîbên xwe yên mirovî û leşkerî û di berdewamiya xebatên xwe yên li dijî terorê, wek Hêzên Ewlekariya Hundirîn, Hêzên Ewlekariya Hundirîn- Jin a Bakur û Rojhilatê Sûriyê, Yekîneyên Parastina Jin (YPJ) û Hêzên Sûriyeya Demokratîk HSD em operasyona ewlehiyê ji bo paqijkirina kampa Hol û derdora wê radigihînin.
Ev operasyon li ser esasê agahiyên rasterast ên ku ji aliyê hêzên me yên ewlekariyê ve hatine tespîtkirin, derbarê hebûna şaneyên rêxistinkirî yên DAIŞê li hundir û derveyî kampa Holê ku hewl didin ewlehî û aramiya kampê û derdora wê têk bibin, pêk tê.
Bi vê operasyonê re em careke din israr û pabendbûna xwe ya bi nirxên mirovî û berdewamiya hewldanên xwe yên ji bo jinavbirina jêderên terorê yên ku ewlehiya gelê me û cîhanê dixe metirsiyê dubare dikin.”
