Dadgehên rejîma Îranê yên wekî amûreke zext û tirsandinê dixebitin, di nava çend hefteyên borî de cezayê darvekirinê li 17 xwepêşanderan birî. Hate ragihandin ku ‘darizandin’ bêyî amadebûna parêzeran, bi lez û bez pêk hatine û 2 xwepêşander beriya niha hatine qetilkirin.
Rejîma Îranê ya li hemberî daxwazên azadî û mafên demokratîk ên gelan xitimî ye, hewl dide bi darvekirinan civakê bêdeng bike. Rêxistina Mafên Mirovan a Hîwayê, bi daxuyaniyekê bîlançoya hiqûqa darvekirinê ya hefteyên dawî eşkere kir û ragihand ku dadgehên rejîmê cezayê darvekirinê li 17 xwepêşanderan biriye. Li gorî daxuyaniya rêxistinê, xwepêşanderên ku di dema çalakiyan de hatine girtin, piştî ku cezayê darvekirinê li wan hate birîn, dîsa şandine girtîgehan.
Bêhiqûqiya darazê: Bêyî parêzeran cezayên darvekirinê
Yek ji xalên herî balkêş ên ku Rêxistina Hîwayê destnîşan kiriye, şert û mercên darizandinên qaşo ne. Rêxistinê ragihand ku piraniya van çalakvanan, ji mafê xwe yê xweparastinê hatine bêparkirin. Dadgehên rejîmê, bêyî ku parêzerên serbixwe di danişînan de amade bin, xwepêşander bi lez û bez darizandine û rasterast cezayên herî giran li wan birîne.
Niha de 2 girtî hatin darvekirin
Di daxuyaniya rêxistinê de, navên beşek ji wan kesên bi xeteriya darvekirinê re rû bi rû ne eşkere kirin: Îsmaîl Remezanpûr, Arman Merîfetî, Reûf Şêxmerûfî, Mihemed Ferecî, Binyamîn Neqdî, Zehra Şehbaz Teberî, Aşkan Malekî, Mehrdad Mihemedîniya, Yasîn Şehbexş, Hesen Mislawî Terefî, Yaqûb Derxîşan, Hesen Emîrî, Husên Emîrî, Elî Kemalî, Hadî Nîkbext û Fezlullah Nîkbext.”
Her wiha hate bibîrxistin ku ji vê lîsteyê, her du girtiyên Kurd Aşkan Malekî û Mehrdad Mihemedîniya, bi hinceta tevlîbûna çalakiyan ji aliyê rejîmê ve beriya niha hatibûn qetilkirin û metirsiya li ser jiyana 15 girtiyên din jî didome.
