Li Goristana Dêbineyê bi amadebûna xizmên enfalkiriyan, bi boneya 38emîn salvegera Enfalê tacegul hatin danîn û qurbaniyên Enfalê hatin bîranîn.
Li Germiyanê bi boneya 38emîn salvegera tevkujiya Enfalê merasîma bîranîna qurbaniyan hate lidarxistin. Li Goristana Dêbineyê ya li bajarokê Rizgariyê ya ser bi Îdareya Germiyanê ve, bi amadebûna xizmên enfalkiriyan, partî û aliyên siyasî tacegul hatin danîn. Ji ber rewşa aloz a herêmê, îsal tu merasîmeke fermî nehat lidarxistin. Malbatên enfalkiriyan û berpirsên partî û hikumetê tenê bi danîna tacegulan qurbaniyên Enfalê bîr anîn. Di bîranînê de xizmên qurbaniyan banga vegerandina cenazeyên enfalkiriyan kirin.
‘Bila tevkujî li tevahiya cîhanê bê nasîn’
Berpirsê Îdareya Germiyanê Celal Şêx Nûrî li cihê merasîmê ji çapemeniyê re axivî û got: “Beriya 38 salan Partiya Baasê kesûkarên me enfal kirin. Di vê salvegerê de em bang li Hikûmeta Herêmê û Hikûmeta Iraqê dikin ku tazmînata madî û manewî bidin kesûkarên enfalkiriyan. Em weke Îdareya Germiyanê ji bo vegerandina cenazeyan û dîtina gorên komî, piştevaniya hemû kesûkarên enfalkiriyan dikin. Em daxwaz dikin ku doza Enfalê li hemû cîhanê weke jenosîd bê naskirin.”
Celal Şêx Nûrî diyar kir ku niha projeya Bîrdariya Enfalê ber bi temambûnê ve diçe û destnîşan kir ku wan xizmetguzariyên gundên ku ber pêla Enfalê ketine jî dabîn kirine.
