Li parêzgeha Helebceya Başûrê Kurdistanê ji ber teqîna guleyeke topê 2 welatiyan jiyana xwe ji dest da.
Li Taxa Mordaneyê ya parêzgeha Helebceyê di seatên nîvro de teqînekê rû da. Li gorî agahiyên hatine wergirtin, dema ku du welatiyan destkarî li guleyeke topê ya dikirin, teqîn pêk hatiye. Di encama teqîna dijwar de her du welatî di cih de jiyana xwe ji dest dan.
Lêpirsîn hate destpêkirin
Hate zanîn ku kesên jiyana xwe ji dest dane welatiyên bi navên Serheng Kebîr û Tiryan Newzad Marfe yên temenê wan 40 salî bûne. Rêveberiya Polîsan a Helebceyê daxuyaniyek da û diyarkir ku tîmên wan derbasî cihê bûyerê bûne û ji bo ronîkirina hemû hûrguliyên teqînê dest bi lêkolîneke berfireh kirine. Derbarê hebûna topê ya li wê herêmê de agahiyên zelal hêj nehatine bi dest xistin. Tê payîn ku topek ji derve hatiye avêtin be.
