Şirnex – Tirkiye bi hinceta “ewlehiyê” têketina sedan gundên li başûrê Kurdistanê qedexe kiriye û şêniyên van gundan nikarin biçin li ser ax û warê xwe. Xelkê li herêmê da zanîn ku hewldanên wan ên çûna li gundên xwe bêencam dimînin.
Artêşa Tirkiyeyê zêdetirî 40 salan in bi hezaran gundên Kurdan şewitandin û valakirin. Taybetî gundên li bakûr û başûrê Kurdistanê hatine valakirin û heya niha jî qedexeyên têketina van gundan didome. Li başûrê Kurdistanê di nava 40 salên dawî de zêdetirî 1000 gund hatin valakirin, bi demê re hin welatî vegeriyabin gundên xwe jî, hêj têketina zêdetirî 600 gundan ji aliyê Artêşa Tirk ve tê astengkirin.
Gundên wan ji sala 1996an ve qedexe ye
Me xwe bi telefonê gihand şêniyên gundên Sileh, Êkmale, Rîsê, Silê û Nizor ên di sala 1996an de ji aliyên Artêşa Tirk ve hatine valakirin. Şêniyên gundan dan zanîn ku wan gelek caran ceribandiye biçin gundên xwe lê her tim rastî leşkerên Tirk ên li baregeha Mila Radê hatine. Welatiyan bi lêv kir ku dema wan ji bo çûna li gundên xwe serlêdana Leqa Leşkerî ya Pêşmergeyan a Zaxo kiriye lê tu encam bi dest nexistine.
Ji bo debarê dixwazin vegerin gundên xwe
Welatiyan destnîşan kir ku beriya ku gundên wan werin valakirin, bi hezaran kes debara xwe bi çandinî û sewalkariya li herêmê dikir û şêniyên gundan dixwazin ji ber şert û mercên aborî yên li bajaran, vegerin gundên xwe û debara xwe bikin. Welatiyên ku ji ber ewlehiyê nexwestin navên xwe bidin, bertek nîşanî sekna rayedarên başûrê Kurdistanê dan û gotin ku heke rayedar mafê wan ê vegera gundan neparêzin nexwe bi kêrî çi karî tên.
Hinceta şer nemaye lê dîsa jî qedexe didomin
Welatiyan herî dawî bal kişand ser Pêvajoya Aştî û Civaka Demokratîk û gotin ku pêvajoyek di navbera Tevgera Azadiyê û Tirkiyeyê de dimeşe. Welatî dan zanîn ku êdî li herêma gundên wan hinceta şer nemaye, lê li gel vê yekê jî ji bo çûna gundan qedexe didomin.
