Enqere – Li Enqereyê Navenda Çanda Anatoliyayê (NÇA) dê were vekirin. Mamoste û Rêveberên NÇAyê amadekariyên vêkirinê dikin. Şanogêr û lîstikvan Rozerîn Baltaş ku xebatên Şanoyê dike, diyar kir ku ew dê di gelek beşên hunerî de perwerdehiyê bidin destpêkirin.
Paytaxta Tirkiyeyê Enqere yek ji bajarên ku hejmareke mezin Kurd lê dijîn e. Hunermendên Kurd ji bo Kurdên ku li Enqere dijîn bi ziman û rengê xwe fêrî hunera xwe bibin, li Enqereyê Navenda Çanda Anatoliyayê (NÇA) vedikin. Her çiqas dîroka vêbûna NÇAyê ne zelal be jî rêveber û mamosteyên NÇAyê amadekariyên vêkirinê dikin. Tê texmînkirin ku heta meheke NÇA dê li Enqereyê dest bi xebatên xwe bike.
Di bin baneya NÇAyê de qursên, tenbûr, sêtêl, gîtar, keman, kemençe, erbane, piyano, çello wê werin dayîn. Her wiha perwerdehiya deng, şano, wênesazî û sînamayê jî dê bên dayîn. Ji bo zarokan jî perwerdehiya drama, rîtîm û koroyê wê bên amadekirin. Di bin baneya NÇAyê de govend û semah jî dê werin fêrkirin. Şanogêr û lîstikvan Rozerîn Baltaş ku dê NÇAyê de xebatên Şanoyê bike, diyar kir ku çand û huner ji bo Enqere weke pêdiviyek e û armanca wan jî ji pêdiviya civakê re bûna bersiv e.
‘Hewl didin ji pêdiviya civakê re bibin bersiv’
Rozerîn Baltaş anî ziman ku li Enqereyê bi salan e kêmasiya saziyeke çand û hunerê hebû û derbarê mijarê de ev tişt gotin: “Bi salan e ji aliyê çand û hunerê ve li Enqere kar û xebateke berfireh û domdirêj nehatibû kirin. Cara yekemîn dê li Enqere di bin baneya Navenda Çanda Anatoliyeyê de kar û xebat werin kirin. Di salên 1992an de bi NÇMê kar û xebat hatibûn kirin lê ev demekê dirêj e kar û xebat di vî warî de nayên kirin. Em jî dê vî barî bigrin ser milan û pêdiviya civakê re hewl bidin bibin bersiv. Bi pir zimanî û rengê jinê em ê kar û xebatên xwe bikin. Li vir kemasiya saziyeke çand û hunerê hebû, em ê jî hewl bidin vê kêmasiya temam bikin.”
‘Ew der mala civakê ye’
Rozerîn Baltaş diyar kir ku ew dê di bin baneya NÇAyê de gelek xebatên çand û hunerî bidin meşandin û wiha dirêjî da axaftina xwe: “Di bin baneya NÇAyê de xebatên ji aliyê muzîkê ve gîtar, tenbûr, piyano û şanoyê hebe. Ji bo zarokan jî polên me dê hebin û mamoste dê di van polan de zarokan perwerde bikin. Li gor daxwazê jî ji kîjan alî daxwaz hebe, em dikarin dersan bidin destpêkirin û qursan vekin. Huner ji siyaset û civakê dûr nîne. Lê li vir mixabin derfeteke me yê hunerê li Enqereyê tune bû. Ji bo wê jî ew der wê bibe malek jî. Deriye me ji her kesê re her tim vêkirî ye. Ew der mala civakê ye. Em ê hewl bidin ji hemû kemasiyên çand û hûnerê yên li vê derê re bibin bersiv.”
‘Xwedî li saziya xwe derbikevin’
Di dawiya axaftina xwe de Rozerîn Baltaş ji bo gel xwedî li NÇAyê derbikeve bang kir û wiha derbirî: “Banga me ya ji bo gelê me ev e ku xwedî li saziya xwe derbikevin. Cara yekem saziyeke bi vî rengî li Enqereyê vêdibe. Zarok, dayik, ciwan û her kes bila werin saziyê û xwedî lê derbikevin. Her wiha li vir fêrî çand û hunera xwe bibin. Em dixwazin gelê me me bi tenê nehêle û hertim li cem me be. Em bi xwedî derketina civakê, li vê derê bandoreke xurt pêk bînin.”
