Rêxistinên DBP û DEM Partiyê û gelek rêxistinên ekolojiyê dê di 9-10ê Îlonê de li Bestayê kom bibin û li djî talankirina xwezayê nobetê bigirin.
Şîrketên bazirganiyê li gelek deveran, bi taybetî li Çiyayên Cûdî, Gabar û Bestayê yên Şîrînex xwezayê talan û wêran dikin. Li dijî tunekirina ekolojiyê ya bi destê cerdevan û leşkeran û şîrketên bazirganiyê pêk tê, dê endam û rêveberên DEM Partî, DBP û saziyên civakî nobetê li dar bixin.
Bi pêşengiya Platforma Saziyên Demokratîk, bi dirûşmeya “Em rê nadin qirkirina ekolojiyê, em li dijî talankirina xwezayê dimeşin” dê du rojan çalakî bên lidarxistin. Aktivîstên ekolojiyê, niştecihên herêmê û parêzvanên jîngehê dê di 9’ê Îlonê de li Qada Cumhuriyetê ya navenda bajarê Şirnexê berî meşê li dijî talankirinê daxuyaniyekê bidin. Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari, Hevserokê Giştî yê Partiya Herêmên Demokratîk (DBP) Keskin Bayindir û gelek parlamenterên DEM Partiyê dê beşdarî çalakiya nobeda şevê bibin.
Dê gelek kes ji Amed, Êlih, Mêrdîn, Sêrt û bajarên derdorê tev li nobetê bibin. Dê di meşê de deh parlamenter bi awayekî çalak peywirdar bin.
Bername wiha ye:
Meş dê di 9ê Îlonê saet di 13:00an de li Qada Cumhuriyetê ya Şirnexê dest pê bike. Piştî civîna çapemeniyê û meşê, girse dê ber bi navçeya Bestayê ve biçe. Çalakiya nobedariyê ku dê saet di 16:00’an de li Bestayê dest pê bike, dê di 10ê Îlonê saet di 10:00an de bi dawî bibe.
Platforma Saziyên Demokratîk wiha bang kir: “Piştgiriyê bidin jiyana ekolojîk a li Cûdî, Gabar, Besta, çiya, çem û daristanan û tevlî meşê bibin. Di vî şerê bêyeman ê li dijî xwezayê de, bibin alîgirê xwezayê û beşdarî meşê bibin. Ji bîr nekin: Xweza ne sermayeya tu kesî ye; ew mala hemû candaran e.”
