KNKê 1ê Gulanê Cejna Karker û Kedkaran pîroz kir û bang li Kurdistaniyan kir ku bi coşa Newrozê beşdarî çalakiyên 1ê Gulanê bibin.
Konseya Rêveber a Kongreya Neteweyî ya Kurdistanê (KNK) 1ê Gulanê Cejna Karker û Kedkaran a Cîhanê bi peyamekê pîroz kir.
Peyama KNKê bi vî rengî ye:
“Karker û kedkaran bi têkoşîna xwe, bi berxwedana xwe, bi xwêdana eniya xwe, bi keda xwe, 1ê Gulanê kirine cejna xwe ya ‘Yekitî, Têkoşîn û Piştgiriyê’. Ev cejn vê gavê li seranserê cîhanê tê pîrozkirin. Bila Cejna 1ê Gulanê li karker û kedkarên Kurdistanê û hemû cîhanê pîroz be.
Kurdistanî karker û kedkarên azadî û rizgariyê ne
Cejna 1ê Gulanê ya hemû xelkê Kurd e, ya Kurdistaniyan e jî. Xelkê Kurd û hemû Kurdistanî ev e serê sedan salan e, ji bo azadiyê, rizgariyê, jiyaneke dilşa û serbilind têkoşînê dikin. Ev têkoşîn bi xwe kedeke mezin û bihadar e. Lewma Kurdistanî karker û kedkarên azadiyê û rizgariyê ne. Pêkve xelkên Kurdistanî jî, bi vê keda mezin ya têkoşînê, cejna 1’ê Gulanê heq kirine. Bila li wan jî pîroz be. Gerîlla û Pêşmergeyên û doza mezin ya Kurdistanê jî, bi fedakirina canê xwe, karker û kedkarên herî rêzdar yên 1ê Gulanê ne, bila li wan jî pîroz be.
Rejîmên zalim û zordar her tim pîrozkirina vê cejnê qedexe kirine, hezaran zor û zehmetî derêxistine pêşiya karker û kedkaran û hemû xelkê, da ku vê cejna kedê pîroz nekin. Lê ne karkeran, ne kedkaran, nejî xelkê, serê xwe li ber van zulmên serdestan şor nekirine û têkoşîn û berxwedana xwe domandine û ev cejn li ser çeperê têkoşînê bi dest ve anîne. Gelê Kurd ji kevin were, ev cejna kar û kedê wekî cejna xwe qebûl kiriye û bi dilgermî, coş û heyecaneke mezin pîroz kiriye.
Pêvajoya diyalogê û hewldanên ji bo yekitî û yekrêziya Kurdan
Em îsal cejna 1ê Gulanê, di rewşeke cuda de pêşwazî dikin. Li Bakurê Kurdistanê ev çend meh in pêvajoyek diyalogê heye. Heta niha gelek caran heyet çûne girava Îmraliyê û bi birêz Abdullah Ocalan re hevdîtin pêk anîne. Gelek bang û daxuyanî hatine dayîn, lê heta niha gavên berbiçav nehatine avêtin. Armanca aliyê Kurd ew e ku bi rêya vê diyalogê pirsgirêka Kurdî û çareser bike. Divê em hemî hewl bidin ku ev diyalog bigihê qonaxa çareseriyê.
Li aliyê din ji bo yekîtî û yekrêzêya nav mala Kurd, ji serê salê û vir ve gavên girîng têne avêtin. Ev e demeke di nava hemî partî û rêxistinên Kurdistanî de diyalogek baş heye. Di van rojên derbasbûyî de li Rojavayê Kurdistanê bi beşdarbûna hemî aliyan konferansek giring pêk hat. Her wiha bi heman mebestê li Ewropa jî, ji bo Rojhilatê Kurdistanê konferansek pêk hat. Di herdu konferansa de ji bo yekîtiya neteweyî nîqaşên berfireh çêbûn û biryarên giring hatin standin. KNKê di herdu konferansande de cihê xwe girt û pêşkêşiya gelek karan kir. Di nava vê salê de emê hewl bidin hem li Bakur hem jî Başûr heman konferans bêne çêkirin û di encamê de emê hewl bidin gorî biryara Konferansa Lozanê, li seranserê Kurdistan konferansekê neteweyî çêbibe.
Li gel vê rewşê jî, li çar aliyên Kurdistanê, dek û dolap û planên dijê gelê Kurd dewam dikin. Projên dijminan mezinin û hemî deskeftên Kurdan di bin xeteriyek mezin de ne. Divê hemî partî, rêxistin û hêzên Kurdistanî vê rastiyê bibînin û gorî vê rewşê tevbigerin. Divê hemî hêzên Kurdistanî, yekîtiya xwe xurttir bikin û bi hevre bi yek dengî dijê van planan derkevin.
Em bi ruhê Newrozê 1ê Gulanê pîroz bikin
Bi vê munasebetê em bang li hemî Kurd û Kurdistaniyan dikin ku li herderî bi coşa Newrozê tev li çalkiyên pîrozbahiya 1ê Gulanê bibin, di van çalakiyan de, li hember êriş û dagirkeriyê derkevin û dengên nerazîbûna xwe ya li dijî dagirkeran bilind bikin û li tenişta hêzên parastina Kurdistanê cihê xwe bigrin.
KNK 1ê Gulanê, vê cejna karker û kedkarên cîhanê, li gelên Kurdistanê û hemû xelkên cîhanê pîroz dike.”
