Platforma Tenduristiyê ya Amedê û Şaxa SESê ya Amedê têkildarî Girêbesta Kar û nêzîkatiya li hemberî kedkarên tenduristiyê daxuyanî dan û xwestin daxwazên karmendên tenduristiyê werin qebûlkirin.
Li Amedê kedkarên tenduristiyê ji bo îmzekirina Girêbesta Kar (Peymana Giştî ya Kar) û nêzîkatiya li hemberî kedkarên tenduristiyê daxuyanî dan. Platforma Tenduristiyê ya Amedê û Şaxa Sendîkaya Kedkarên Tenduristiyê û Xizmeta Civakî (SES) ya Amedê li pêşiya Nexweşxaneya Selehattîn Eyubî daxuyanî dan çapemeniyê. Di daxuyaniyê de endam û rêveberên sendîkayên tenduristiyê û gelek bijîşk amade bûn û pankartek vekirin û dirûşma “Bijî Berxwedana Kedkaran” berz kirin.
‘Şer li dijî tenduristiya gel e’
Sekretara Jinan a Şaxa SESê Îlknûr Ayîk daxuyaniya xwend û diyar kir ku ew dizanin ku şer bandorek xerab li ser qada tenduristiyê û kedkarên tenduristiyê dike û got: “Em dizanin pereyên ku ji bo karên tenduristiyê bê xerckirin ji bo şer tê veqetandin û ji bo şer diçe. Ev pere ji bo berjewemendiya gel were xerckirin dê gel jiiyanekî baş bijî. Ji bo vê yekê em dibêjin kedkar bi sînorê birçîbûnê re rû bi rû ne. Tevahî karker di nava krîza aborî de dijîn.”
‘Divê sîstemek demokratîk were avakirin’
Îlknûr Ayik da zanîn ku grev û sendîka hêza karkerên tenduristiyê ye û got: “Divê qanûna sendîkayê bê îmzakirin. Ji bo kedkarên tenduristiyê divê sistemekî demokratîk bê avakirin. Sîstema ku tundiyê derdixe holê divê were guherandin. Kesên ji karên xwe hatine derxistin, divê dîsa vegerin ser karên xwe.”
