Mêrdîn – Jinên siyasetmedar ên li Parîs û Silopiyayê ji aliyê dewleta Tirk ve hatin qetilkirin, li Nisêbinê hatin bibîranîn. Di bîranînê de wiha hate gotin: “Heta em azad bibin em ê têkoşîna xwe bidomînin.”
Ji bo siyasetmedarên jin ên Kurd Sakîne Cansiz, Fîdan Dogan û Leyla Şaylemez ên di 9’ê Çileya 2013’an de li paytexta Fransayê Parîsê hatin qetilkirin û Sêvê Demîr, Pakîze Nayir û Fatma Uyar ên li Silopiyaya Şirnexê hatin qetilkirin, li navçeya Nisêbîn a Mêrdînê çalakiya bîranînê hat lidarxistin.
Ji bo bîranînê, li Parka Aştiyê ku çalakiya nobetê ya li dijî êrîşên dewleta Tirk û koma wê ya paramîlîter SMOyê yên li ser Bakur û Rojhilatê Sûriyeyê hatiye destpêkirin, gelek kes hatin gel hev. Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari û gelek jin li parkê kom bûn, dirûşma “Jin, jiyan azadî” berz kirin û wêneyên jinên hatine qetilkirin hilgirtin.
Di meşê de jinan pêşmalkên “Jin, jiyan, azadî” li xwe kirin û wêneyên jinên li Parîsê hatin qetilkirin û rojnamevanên li Rojava hatin qetilkirin hilgirtin.
Girse bi dirûşmên “Bijî berxwedana Rojava”, “Jin, jiyan, azadî”, “Çapemeniya azad rûmeta me ye” ber bi sînor ve meşiya. Di meşa ku li Kolana Lozanê bi dawî bû de daxuyanî hat dayîn.
Hevseroka MEBYA-DER a Mêrdînê Gurbet Tekîn ku ewilî axivî, destnîşan kir ku ew ê têkoşîna jinên hatine qetilkirin bişopînin. Tekîn bal kişand ser astengiyên wergirtina cenazeyên Cîhan Bîlgîn û Nazim Daştan û wiha got, “Em ê li gel malbatên xwe bin.”
Pişt re aktîvîsta TJAyê Hatîce Oncu metna daxuyaniyê xwend. Oncu diyar kir ku ew ê li ser şopa jinên hatine qetilkirin, têkoşîna xwe bidomînin û got: “Ji Sara heta Sêvêyan, têkoşîna me ya bi Evînê re wê tu carî bi dawî nebe. Sara, Rojbîn, Ronahî, Sêvê, Pakîze, Fatma, Evîn, Nagihan, Cîhan peymana me ya azadiyê ne.”
‘Sedema vê kaosê neçareserkirina pirsgirêka Kurd e’
Pişt re Parlamentera DEM Partiyê ya Mêrdînê Salîha Aydenîz axivî û diyar kir ku di sala 2013yan de dema pêvajoya çareseriyê dest pê kir Komkujiya Parîsê pêk hat û wiha axivî: “Me dît ku piştî 13 salan zîhniyet neguheriye. Sedema vê kaosê jî çaresernekirina pirsgirêka Kurd e. Bi Komkujiya Parîsê re daxwaza aştî û azadiyê hat xwestin bê qetilkirin. Lê ji wê rojê û vir ve daxwaza azadiyê bêdeng namîne. Em ê bi têkoşîna xwe vê zîhniyetê bi paş ve bixin û rêya hevalên xwe bişopînin. Heta em azad bibin em ê têkoşîna xwe bidomînin.”
‘Em ji bo rê li ber têkoşîna azadiyê ya jinan vekin têdikoşin’
Piştre Hevseroka Giştî ya DEM Partiyê Tulay Hatîmogûllari axivî û bal kişand ser astengiyên polîsan û wiha got: “Em ji bo rakirina van astengiyan û veguherîna welatekî demokratîk têdikoşin. Em ji bo bidestxistina hemû mafên destûrî yên welatiyekî têdikoşin. Em weke DEM Partiyê ji bo rê li ber têkoşîna azadiyê ya kedkar, kedkar, bindestan, mêtingeran û jinan vekin têdikoşin. Ez careke din teqez dikim; Em ji bo bidestxistina mafên xwe yên hemwelatîbûnê û mafên partiyên siyasî yên ku di destûrê de hatine diyarkirin têdikoşin. Lê mixabin îro ev rejîm careke din têk çûye û li pêşiya jinan bend daniye.”
Tulay Hatîmogûllari di berdewamiya daxuyaniyên xwe yên têkildarî Komkujiya Parîsê de jî wiha axivî: “Îro salvegera Komkujiya Parîsê ya 9ê Çileyê ye. Tê bîra we, 12 sal berê li Parîsê Sakîne Cansiz, Leyla Şaylemez, Fîdan Dogan, 3 jinên siyasetmedar ên Kurd hatin qetilkirin. Di sûîqestekê de hatin qetilkirin. Cihê mixabiniyê ye ku rastiya vê bûyerê ji raya giştî re nehatiye eşkerekirin û rayedarên ku Fransa jî di nav de ye, derbarê vê mijarê de daxuyaniyên pêwîst nedane. Ne tenê ev her sê jin gelek siyasetmedarên jin ên Kurd li her derê bûne hedef. Ji ber ku ev feraset, ev pergala serdest a mêr, bi dewletê re destê xwe dide kuştina jinan.”
‘Ji bo aştî li vê erdnîgariyê çêbibe em ê hewl bidin’
Tulay Hatîmogûllari wiha dawî li axaftina xwe anî: “Ji ber ku em deynê xwe yê li hemberî vê erdnîgariyê dizanin, ji bo aştiyê li vir çêbibe em ê her hewl bidin. Ji vir heta aliyê din ê sînor peyameke me ya din jî heye: Ji bo pêkanîna aştiyê li Sûriyeyê her tiştî em ê bikin. Lê em ji vir dixwazin serî li hemû hêzan bidin. Em li vir bang li civaka navneteweyî dikin; divê her kes xwêya xwe ya erênî di vê şorbê de hebe. Em ê ti carî dev ji gotina aştiyê bernedin.”
Tevî astengiyê jî meşiyan
Piştî daxuyaniyê çalakiya rûniştinê hat lidarxistin. Piştî çalakiya rûniştinê jinan heta avahiya DEM Partî ya navçeyê meşiyan. Polîsan careke din bend danîn û hewl dan meşa jinan asteng bikin. Jinan li ber bendan rabûn û bi dirûşmeyan dest bi meşê kirin.
Gel piştî meşê li pêşiya avahiya navçeyê li hev civiyan û çalakiya biranînê bi dawî kirin.
