Jinên li bajarên Kurdistanê û Tirkiyeyê di bin banê Pêkhateyên Mîtînga Jinan de li Enqereyê hatine cem hev ji bo daxwazên xwe bînin ziman bi berzkirina dirûşmeyên, “Bijî berxwedana Rojava” ber bi qada mîtîngê ve meş li dar xistin.
Pêkhateyên mîtînga jinan, li dijî polîtikayên desthilatê ji bo daxwazên xwe bînin ziman li Qada Tandogan a navçeya Çankaya ya Enqereyê mîtînga jinan li dar dixin.
‘Jîn jî bo jiyana azad û wekhev bi israr in’
Bi hezaran jin li pêşiya Navenda Çandê ya Ataturk hatin ba hev û li wir heta qada mîtîngê bi kurtejan meş li dar xistin. Jinên di meşê de pankarta “Em di jiyana azad û wekhev de bi israrin û li dijî tundiya dewleta zilam di raperînê de ne” vêkirin, bi dovîz hilgirtin û dest bi meşe kirin. Hevseroka Giştî ya DEM Partî Tulay Hatîmogullari, Hevşeredara Bajarê Mezin a Amedê Serra Bucak û parlamenterên DEM Partiyê û gelek jin beşdarî meşê bûn. Jin di meşê de dirûşmên, “Bijî berxwedana Rojava”, “Bijî berxwedana jinan”, “Jin, Jiyan Azadî” û “Jin şer naxwazin aştiyê dixwazin” berz kirin.
Bi hatina qada mitîngê, mitînga jinan dest pê kir. Di mîtîngê de metna hevpar a daxuyaniyê dê were xwendin û di dawiyê de Koma Bandîsta dê derkeve ser dikê û stranên xwe bistrîne.
