Baregeha Navendî ya Xatemul Enbiyayê ragihand ku eger artêşa Amerîkayê êrîşî navendên nukleerê bike, dê bi tundî bersivê bidin û wê şer were berfirehkirin.
Baregeha Navendî ya Xatemul Enbiyayê ya Îranê daxuyaniyek belav kir û bi bîr xist ku Amerîkayê gefa êrîşkirina navendên nukleer û hestiyar ên Komara Îslamî ya Îranê xwariye.
Di daxuyaniyê de hate gotin ku ger Amerîka derbasî qonaxeke bi vî rengî bibe ew ê vê yekî wekî berfirehkirina şerê li herêmê bihesibînin û wiha hat gotin: “Hemû berjewendiyên Amerîkayê, hevpeyman û alîgirên wî welatê serhildêr û şerxwaz, dê bibin armanca êrîşên bihêz ên Hêzên Çekdar ên Komara Îslamî ya Îranê.”
Hêjayî gotinê ye Serokê Amerîkayê Donald Trump duh ragihandibû ku dibe ew ‘di demeke nêzîk de’ êrîşî wan deveran bikin ku Tehranê amûr û madeyên nukleerê li wan deran veşartine.
Trump ragihandibû ku ew ji tevgeran agahdar in, bi îhtimaleke mezin, ew dê di demeke gelekî nêzîk de li wan herêman bidin û wiha gotibû: “Îran nikare tiştekî li hemberî me bike. Bi awayekî normal ez tiştên wiha nabêjim lê eger min hîs bikira ku dikarin ji bo parastina wan cihan tiştekî bikin, min dê qet ev yek negota. Lê ez dîsa dibêjim, em dê gelek zû li wan herêman bidin.”
