Tevî ku Serokê Amerîkayê Donald Trump pêşniyara Îranê red kir jî, Tehranê ragihand ku ew ji bo jinûve vekirina Tengava Hurmuzê ji daxwazên xwe paşve gav naavêjin. Lê dîsa jî rêveberiya Tehranê da zanîn ku deriyê wan ji bo dîplomasî û danûstandinan vekiriye.
Li gorî nûçeya Televîzyona Dewletê ya Îranê, Wezîrê Karûbarên Derve yê Îranê Abbas Arakçi têkildarî vekirina Tengava Hurmuz û şertên ku daniye ber Amerîkayê diyar kiriye ku şertê wan diyar in, vekirina Tengava Hurmuzê girêdayî pêkanîna şertan e û dê tu carî ji biryara xwe paşve ga neavêjin û tawîzan nedin.
Rêveberiya Îranê roja Înê ragihandibû ku wan pêşniyarek pêşkêşî Amerîkayê kiriye; li gorî vê pêşniyarê heke daxwazên Tehranê bên qebûlkirin, ew ê di nav heft rojî de tengava Hurmuzê ji bo derbasbûnê vekin. Lê belê Serokê Dewletên Yekbûyî yên Amerîkayê (DYA) Donald Trump roja Şemiyê bi fermî dabû xuyakirin ku wan ev pêşniyar red kiriye.
Arakçi bal kişand ser vê berteka yekem a Amerîkayê û diyar kir ku ew bi rêya navbeynkaran li benda helwesta dawî ya Amerîkayê ne û got ku deriyê dîplomasiyê heta dawiyê vekirî ye.
Li gorî agahiyan, di pakêta Îranê ya ji bo rawestandina şer û vekirina tengavê de 7 şertên bingehîn cih girtine. Ji van şertên sereke ev in: Li hemû Rojhilata Navîn Lubnan jî di nav de agirbesteke 7 rojî bê ragihandin; Bi kêmî ve 12 milyar dolar ji hebûnên Îranê yên ku hatine cemidandin bêne berdan; Pêkanînên dorpêçê yên li ser firotina petrola Îranê bêne rakirin; DYA dawî li ambargoya xwe ya deryayî ya li ser bendewarên Îranê bîne.
Beriya ku şer derkeve, nêzî beşek ji pênc beşên bazirganiya petrol û gaza xwezayî ya cîhanê di vê tengavê re derbas dibû. Lê piştî êrîşên DYA û Îsraîlê yên li ser Îranê, Tengava Hurmuzê bû yek ji qadên herî krîtîk ên vê pevçûna herêmî. Di heman demê de ku Îran kontrola xwe ya li ser tengavê didomîne, DYA jî dorpêça xwe ya li ser benderên Îranê didomîne.
Li aliyê din, rojnameya Wall Street Journal îdîa kir ku Serokê Amerîkayê Donald Trump plan dike ku piştî hilbijartinên bo kongreyê yên 3yê Mijdarê, êrîşên hewayî yên li ser Îranê ji nû ve bide destpêkirin.
