Înîsyatîfa Yekîtiya Demokratîk, destnîşan kir ku êrişa li ser Kobanê û dorpêçkirina wê sûcê li dijî mirovahiyê ye û ji bo vekirina korîdorên mirovî bang li saziyên navneteweyî kir.
Înîsyatîfa Yekîtiya Demokratîk, têkildarî dorpêç û êrişa li ser Kobanê bi sernavê “Kobanê duh ne tenê bû, dê îro jî ne tenê be!” daxuyaniyeke nivîskî da. Di daxuyaniyê de êrişên niha ji aliyê HTŞ, DAIŞ û komên paramîlîter ên ji aliyê Tirkiyeyê ve tên piştgirîkirin li ser Kobanê tên kirin û dorpêça li ser bajêr hatin şermezarkirin. Di daxuyaniyê de hat gotin ku ev sûcê li dijî mirovahiyê ye û ji bo vekirina korîdorên mirovî bang li saziyên navneteweyî hat kirin.
‘Li Kobanê rûmeta hemû mirovahiyê hat parastin’
Daxuyaniya Înîsyatîfa Yekîtiya Demokratîk wiha ye: “Bajarê Kobanê 12 sal berê ji aliyê DAIŞ’ê ve hat dorpêçkirin û li ber çavên hêzên herêmî û navneteweyî li ser şêniyên Kobanê êrişên giran hatin meşandin. Di encama êrîşên DAIŞê de bajar û gundên Kurdan hatin wêrankirin, bi sed hezaran kes ji warê xwe hatin koçberkirin û li ser gelê sivîl komkujiyeke mezin hat pêkanîn.
Li dijî êrişên li ser Rojava gelê Kurd û dostên wan bi hev re berxwedeneke bêhempa dan destpêkirin û bi mehan li Kobanêyê li ber xwe dan. Di heman demê de li çar aliyên Kurdistanê jî gelê Kurd bi ruhê azadî û yekîtiyê li Kobanêyê xwedî derket û nehîşt rûmeta xwe bikeve xwarê. Li Kobanê tenê ne rûmeta gelê Kurd, rûmeta hemû mirovahiyê hat parastin û Kobanê 11 sal berê roja 26ê Çileyê hat rizgarkirin.
‘Komployeke navneteweyî’
Lê mixabin gelê Kurd li Rojava îro jî di bin êrîşên çeteyan de ye, Kobanê bi dorpêçeke hov tê cezakirin. Lewra em dizanin ku bi têkbirina DAIŞ’ê her kes kêfxweş nebû û heta roja îro jî ev ji wan re bibû kul û derd. Ji ber vê ye ku rê li ber çeteyên HTŞ’ê hat vekirin û bi armanca bêstatu hiştina gelê Kurd, komployeke navneteweyî dan destpêkirin. Li dijî êrîşên pirralî û berfireh, hêza bingehîn a gelê Kurd, yekîtiya neteweyî û piştevaniya civakî ye.
Trajediya li Kobanê
Neyarên mirovahiyê tenê ne bi êrîşên leşkerî, di heman demê de bi dorpêçeke dijmirovî dixwazin ku îradeya gelê sivîl jî têk bibin. Ji ber vê bi rojan e li ser Kobanêyê av, ceyran û înternet hatiye birîn û rê nayê dayîn ku tiştên jiyanî yên bingehîn wekî xwarîn, vexwerin û derman bigihên bajêr. Agahiyên Heyva Sor a Kurd jî giraniya trajediya li Kobanê diqewîme nîşanî raya giştî dide. Lewra li Kobanêyê duh 5 zarokan ji ber sermayê canê xwe ji dest dan û hê jî li ser sed hezaran xetereyeke jiyanî didome.
Ji xeynî êrîşên leşkerî, bi awayekî plankirî dorpêçkirin jî wekî çek tê bikaranîn. Lewra bi taybetî hebûna neteweyî ya Kurd wekî xetere tê dîtin û hedefgirtin. Eger Konseya Ewropayê, Neteweyên Yekbûyî û hemû saziyên mafên mirovan ên berpirsiyar li mîsyona xwe ya bingeh xwedî dernekevin, dê bibin sedema qeyraneke mirovî. Ji ber vê, divê demildest korîdorên mirovî werin vekirin, ji bo gelê sivîl û zarokên tiştên jiyanî yên bingehîn werin peydakirin.
‘Li dijî sûcên dijmirovî deng bidin’
Her wiha, li dijî amborgoya li ser Kobanêyê divê raya giştî ya Kurdistan, Tirkiye û cîhanê jî xwedî hestyariyeke xurt be. Lewra çeteyên hov, hêz û cesareta xwe ji bêdengiya li hemberî zilm û zordariyê ya li Rojava didomin digirin. Em bang li her kesê ku xwedî wijdan dikin ku li hemberî êrîş û dorpêça hovane ya çeteyan bêdeng nemînin û li dijî sûcên dijmirovî deng bidin.
Gelê Rojava, çawa ku 11 sal berê nehîşt rûmeta xwe bikeve xwarê, dê îro jî nehêle û li ber xwe bide. Tevahiya gelê Kurd jî dê dîsa bê şik û guman li xwişk û birayên xwe xwedî derkeve. Tevî hemû êrişên hovane, geşbûna ruhê yekîtiya neteweyî îro cihê şanazî û kêfxweşiyê ye. Dîrok jî nîşanî me dide ku di van rojên dijwar û tarî de em ê ancax bi yekîtiyê serbikevin.
‘Kobanê ne bi tenê ye’
Ji ber vê, em êriş û dorpêça li dijî gelê xwe yê Rojava şermezar dikin û di 11emîn salvegera rizgariya Kobanê de banga xwedîderketin û piştevaniyê dikin. Kobanê ne tenê ye, bi yekîtiya gelê Kurd dê tarîtiya li ser Kobanê teqez belav bibe.”
