Bedlîs – Ridvan Korkmaz di sala 2015an de li dijî hovitiya DAIŞê ya li ser gelê Kobanê tev li refên Tevgara Azadiya Kurdistanê dibe. Dayika Ridvan Korkmaz, Meryem Korkmaz da zanîn ku kurê wê Ridvan kesekî dilovan û canfedayê hevalên xwe bû û wiha got: “Li dijî êrişên li ser Rojava û Kobanê bêdeng nema, xatir ji me xwest û tev li têkoşîna azadiyê bû.”
Ridvan Korkmaz (Sîser Tetwan) di sala 1989an de li navçeya Tetwanê ya Bedlîsê di nav malbateke welatparêz de çavên xwe ji jiyanê re vedike. Ew jî wekî bi milyonan zarokên Kurd hê di zarokatiya xwe de şahidiya zilm û zordariya dewletê dike. Di ciwantiya xwe de rastiya xwe, gelê xwe û zordariya dewletê fêm dike, têdigihije û li dijî polîtîkayên bişaftin û qirkirinê bêdeng û bêhelwest namîne. Ridvan Korkmaz di hezîrana sala 2015an de, di pêvajoyeke ku hêzên hegemonîk û mêtinger planên qirkirina gelê Kurd û Tevgera Azadiya Kurdistanê dabû destpêkirin de, bi rihê seferberiyê berê xwe dide çiyayên azad û tev li berxwedana dîrokî dibe. Sîser Tetwan li dijî êrişên qirkirinê, her cure polîtîkayên bişaftin û tunekirin bê deng namîne û exlaq û wijdana wî vê rewşê qebûl nake.
Dayika Ridvan Korkmaz Meryem Korkmaz behsa zarokatî, tevlîbûn û şehadeta kurê xwe û têkoşîna xwe kir.
Soza dayika xwe pêk anî
Dayika Aştiyê Meryem Korkmaz bal kişand ser zarokatiya Ridvan û da zanîn ku ew kesekî dilovan û can fedayê hevalên xwe bû, dilxaz bû. Meryem Korkmaz diyar kir ku ew bibû şahidê zor û zehmetî, dorpêç û erişên li ser gundan ên salên 90î û di berdewama axaftina xwe de wiha got: “Ridvan ji êrişên DAIŞê yên li ser Kobanê pir bandor dibû. Her tim digot ez ê herim şerê Kobanê. Rojekî ew û hevalekî xwe bi hev re, di 11 hezîran 2015 de hatin cem min. Bavê wî jî boyaxê dikir. Bavê wî got; ‘Ridvan tu hatiyî alîkariya min?’ Kenîyan û got; ‘Na, ez hatime helaliyê ji we bixwazim, dayê şîrê xwe li min helal bike ez ê biçim.’ Min got dibe ku henekên xwe li min dike. Min jê pirsa, ‘dê ku ve biçî’ kir. Got, ‘me biryara xwe daye, em ê biçin Kobanê. Me biryar daye, em ê herin. Şerekî giran li ser Kobanê heye, em ê biçin Kobanê azad bikin.’ Hevalê wî jî got, ‘Dayê em henekan nakin, em ê biçin, em ê mehekî şûn ve bizivirin. Kurê min hat, ez hembêz kirim û behna min kişand xwe. Min got kurê min çûyîn heye hatin tuneye, zor û zehmetî, tîbûn û birçîbûn heye. Heger tu biçî, rojekî vegerî, di nav hevalan, nav gel de min nedî şermê. Keniya, car din ez hêmbêz kirim û got; ‘Na dayê, min vê carê biryar daye ez ê biçim. Dayê te di salên 90an de sozek dabû Şehîd Xeyrî, te gotiye Ridvan wê bibe alîkarê te.’”
‘Bila bêhna kîmyasalê jê biçe’
Meryem Korkmaz piştî ku kurê wê tevli refên gerîla dibe bi salan jê agahî nagire. Piştî sê salan xebera dilşewat a şehadeta Sîserê wê jê re tê. Meryem Korkmaz wiha behsa şehadeta kurê xwe kir: “Rojekî agahî ji min re hat, gotin Ridvan li Sêrtê ye. Me jî digot li aliyê Rojava ye, li Kobanê ye. Gotin li Sêrtê şehîd ketiye. 2yê Cotmeha 2018an li Sêrtê şehîd ket. Me li wir cenazeyê wî anî, anîna cenaze jî gelekî zehmet bû. Em dorpêç kirin. Ridvan û hevalên xwe bi kimyasalê şehîd ketibûn. Dema me cenaze dianî, em gihiştin Ava Weqfê (Buzlupınar), min got em ê bişûn, bila bêhna kimyasalê jê biçe, nehêlan em cenazeyê xwe bişûn. Li Sêrtê heta Bedlîsê em dorpêç kirin.”
Piştî şehadeta Ridvan tev li Dayikên Aştiyê dibe
Meryem Korkmaz piştî şehadeta kurê xwe di nav Meclisa Dayikên Aştiyê yên Tetwanê de cîh digire û ji bo ku êdî dilê tu dayîkan neşewite, ji bo aştî, azadî û jiyaneke bi rûmet têkoşîna kurê xwe di nava Dayikên Aştiyê de dimeşîne. Meryem Korkmaz herî dawî daxwaz û armancên xwe anîn ziman û axaftina xwe wiha bi dawî kir: “Her tim daxwaza me aştî ye, em dibêjin bila êdî aştî, azadî û aramî were. Bila zarokên me azad bin, Serokê me azad be. Em jiyaneke xweş û hevpar dixwazin.”
