Waliya Helebceyê Nuxşe Nasîh rexne li hikûmeta demborî ya Herêmê Kurdistanê kir û anî ziman ku Hikûmetê nekariye li gorî pêwîstiyan xizmeta bajêr, malbatên şehîd û birîndarên kîmyabaranê bike.
Li Helebceyê bi boneya 38emîn salvegera komkujiya Helebceyê daxuyanî hate dayîn. Waliya Helemceyê Nuxşe Nasîh, rayedarên bajar, nûnerên rêxistinên civakî û gelek welatî beşdarî daxuyaniyê bûn. Koma bi armanca bîranînê belavbûyî deste gul danî ber peykerê Helemceyê. Li vir Waliya Helebceyê Nuxşe Nasîh axaftinek kir û balkişand ser pirsgirêkên qurbaniyan û bajêr.
‘Em dê ji bo pêkanîna daxwazên wan têbikoşin’
Nuxşe Nasîh diyar kir ku Helebce sembola Kurdistanê ye û wiha axivî: “Helebceyê Kurdistan bi hemû cîhanê daye naskirin. Lê xizmetên ku ji aliyê hikûmetê ve têne pêşkêş kirin ne li gorî daxwazên malbatên şehîdan e. Ez soz didim malbatên şehîdan û xelkê Helebceyê ku emê ji bo pêkanîna daxwazên wan têkoşînek bi hêz bidin.”
‘Bila civîna Parlementoyê li Helebceyê pêk bê’
Li ser mijarê Nuxşe Nasîh diyar kir ku peyamek ji çend xalan ji bo Hikûmeta Herêmê, Hikûmeta Iraqê û Parlamentoya Herêma Kurdistanê amadekirine. Nuxşe Nasîh balkişand li ser rewşa qurbaniyên kîmyabaranê û wiha domand: “Bila yekem civîna Parlamentoya Herêma Kurdistanê û Hikûmetê li parêzgeha Helebceyê were lidarxistin, da ku ji nêz ve pirsgirêkên xelkê bajêr û malbatên şehîdan agahdar bibin.”
‘Qurbanî ji xizmeta tenduristiyê bêpar in’
Nuşxe Nasîh got ku di salên borî de jî gelek daxwaz pêşkêş kirin lê Hikûmetê alîkariya pêwist nedaye bajêr û wiha pêde çû: “Tevî biryar hatiye dayîn ku birîndarên çekên kîmyayî bişînin derveyî welêt jî ev yek pêk nehat. Em ji Hikûmeta Herêma Kurdistanê re dibêjin ku qurbaniyên çekên kîmyayî ne tenê nayên emeliyatkirin, ji wergirtina dermanan û serdana bijîşk jî bêpar in. Pêwîstiya wan bi çavdêriya bijîşkî ya berdewam û nêzîk heye.”
‘Doza zarokên winda wekî xwe dimîne’
Her wiha Nuxşe Nasîh destnîşan kir ku doza zarokên windabûyî hîna wek xwe maye ku dozek pir girîng e. Nuxşe Nasîh ji ber vê yekê divê kabîneya nû ya Hikûmeta Herêma Kurdistanê bi cidî li ser vê dozê bixebite û wiha got: “Gelek giliyên me li ser Wezareta Şehîdan û Tenduristiyê hene. Wan li gorî pêwîst alîkariya malbatên şehîdan û qurbaniyên çekên kîmyawî nekirine. Em daxwaz dikin ku bêtir bala xwe bidin bajêr, malbatên şehîdan û xelkê wê.”
