Xebatkarên NÇMê û endamên TJAyê li Amedê di 33yemîn salvegera şehadeta Hozan Mizgîn de ew bibîranîn.
Kedkarên Navenda Çanda Mezopotamyayê (NÇM) û endamên Tevgera Jinên Azad(TJA) bi munasebeta 33yemîn salvegera şehadeta Hozan Mizgîn (Gurbet Aydin) li navenda Şanoya Bajêr a Amedê bernameya bîranînê pêk anîn. Endamên TJAyê, xebatkarên NÇMê û gelek welatî tevî bernameya bîranînê bûn. Bername ji bo şehîdên şoreşê bi deqeyekî rêzgirtinê destpê kir.
Mizgîn miroveke pir dilnizim bû
Dûre xwişka şehîd Hozan Mizgîn Şukran Aydin di derheqê şehîd Hozan Mizgîn de axaftinek kir. Şukran Aydin anî ziman ku şehîd Mizgîn keseke pir dilnizm bû û axaftina xwe wiha doman: “Mizgîn ji mirovan, ji welatê xwe pir hez dikir, her tim di nav lêgerînê de bû. Di oxira welatê xwe de şehîd ket. Ez bejna xwe li hember bîranîna wê û hemû şehîdan ditewînim. Em dixwazin di demeke kin de aştî pêk were.”
Dûre sînevîzyoneke ku jiyana şehîd Hozan Mizgîn vedigot hat nîşandan. Piştî sînevîzyonê hunermend Sorjiyan û hunermend Eylul Nazlier derketin ser dikê. Her du hunermendan bi stranên şehîd Hozan Mizgîn gotin. Dema stranên şehîd Hozan Mizgîn hatin gotin beşdarvanan kêliyên hestiyar jiyan. Di heman demê de gelek caran dirûşmên “Şehîd namirin” ji aliyê beşdarvanan ve hatin berzkirin.
