Yek ji damezrîner û nivîskarên kovara Bîrnebûnê Dr. Mem Xelikan ji ber krîza dil jiyana xwe ji dest da.
Dr. Mem Xelikan (Mehmet Ozsoy) sala 1956an li gundê Xelîkan a Konyayê ji dayik bû. Dibistana seretayî li gundê xwe, dibistana navendî û lîse jî li Enqereyê xwend. Sala 1975an li Zanîngeha Egeyê dest bi xwendina Fakulteya Tibê kir û sala 1980yî qedand.Piştî mezûniyetê, bi salan li Kulu û Enqereyê wekî bijîşk kar kir.
Helbestvan Mem Xelîkan yek ji damezirêner û nivîskarên Kovara Bîrnebûnê bû ku bi taybetî ji bo Kurdên Anatoliya Navîn dihate weşandin. Ji bilî helbestan, wî nivîsên çandî û folklorî jî dinivîsand. Di van salên dawî de bi taybetî bala xwe dabû ser kilamên Kurdên Anatoliya Navîn.
Pirtûka wî ya yekem a helbestan “Şevbider im” sala 2009an hat weşandin.
Pirtûka wî ya duyem jî bi navê “Serenad” e. Ev jî 2023an de hat weşandin.
Cenazeyê Mem Xelîkan ku li Enqereyê wefat kiribû, li gundê wî hat defnkirin.
Yek ji helbestên Mem Xelikan wiha ye:
Ne bes e
Evîna te ya min
Bi sewdaya xwe meyandî
Birîna te ya min
Bi germiya agirê Newrozê kewandî
Dîroka te ya min
Bi xwîna keç û xortan xemilandî
Qelendê te yê
Ne bes e
Bav û kalên min
Li ser axa te kon vekirin
Ji bo parastin û azadî ya te
Keç û xortan
Bi bisk û guliyên te yên zer de
Xwe dardakirin
Ne bes e
Ev çend sedsal in
Ji bo te di în û çiyan de
Li hember dijmin
Dest bi çekan sîng vekirin
Ji bo rizgariya te
Çend caran ava Dîcle û Feratê
Bi xwîna xwe sor kirin
Ne bes e
De bêje Dayîka Delal
Kîngê dest bidî me
Kîngê pêsîrên xwe yên spî
Dirêjkî lêvên me
Bes e înat neke
Hetanî azad nebûyî
Min bin ax neke
Bes e
Bîrnebûn hejmar 50, havîn 2011
