Şirnex – Endamê Sekreteryaya Însiyatîfa Yekîtiya Demokratîk Hasan Ozguneş der barê xebatên însiyatifê de diyar kir ku ji bo tifaqa Kurdan pêk bê, hewldanên wan didomin.
Nûnerên partiyên siyasî yên Kurdistanî, saziyên civaka sivîl, rûspî, oldar, bawermend, kesayet, jin û parlamenter jî di nav de Înîsiyatîfa Yekitiya Demokratîk di 11ê Gulanê de hat ragihandin û însiyatîf ji bo tifaqa nav Kurdan de pêk bîne xebatên xwe berdewam dike. Endamê Sekreteryaya Însiyatîfê Hasan Ozguneş derbarê xebatên dimeşînin de agahî dan û got: “Em ê di 27ê Îlonê de li Şirnexê civîna danasînê pêk bînin, Di 11 û 12ê cotmehê jî em ê konferansa bawerî û gelan pêk bînin.
Gelê Kurd ji ber bêtifaqiyê gelek tişt winda kirine
Hasan Ozguneş da zanîn ku di pêvajoyek ev qas girîng de ji bo Kurdan tişta herî pêwist tifaq e û axaftina xwe wiha berdewam kir; “Gelê Kurd di dirokê de êşa kişandiye, ji bêtifaqiyê kişandiye. Me jî di salek dawî ji bo tifaqeke xurt xebat meşand û xebatên me berdewam dikin. Em hewl didin di pêvajoyeke ev qas girîng de tifaqekê ava bikin. Ji ber ku di derdora welatê me de gelek buyerên nû diqewimin û di encama van buyeran de ji bo serkeftina gelê Kurd hewceyî bi tifaqê heye. Armanca me ew e ku hemû saziyên Kurdistanî ên demokratik bigehin hev û him hewl bidin dewletê demokratîk bikin, him jî civakek demokratîk û ehlaqî ava bikin.”
Li Mêrdînê dê konferansa bawerî û gelan pêk bê
Hasan Ozguneş derbarê xebatên di meha îlon û cotmehê de jî agahî dan û wiha dirêjî da axaftina xwe; “Heya niha me li bajarên Çewlig, Colemêrg, Mûşê û gelek bajarên din civînên danasînê pêk anîne. Me bernameyek xistiye pêşiya xwe ku her meh li çend bajarên din jî civînên danasînê û xurtkirina tifaqa Kurdistanî pêk bînin. Di 27ê îlonê de em ê civîna danasînê û xurtkirina tifaqê li Şirnexê pêk bînin. Ji bo vê civînê jî me gelek sazî û rêxistin, her wiha rûspiyên civakî dawet kirine.”
Hasan Ozguneş herî dawî da zanîn gelê Botanê di têkoşîna gelê Kurd de xwedî cihek girîng e û axaftina xwe wiha bi dawî kir; “Gelê Botanê di têkoşîna Kurdan de xwedî cihek pîroz e. Gelek ked daye û zehmetî kişandiye. Ji bo têkoşînê dîsa barekî giran dikeve ser milê gelê Botan. Em bang li gelê xwe dikin ku bi tevlîbûnek xurt beşdarî civîna danasîn û xurtkirina tifaqa Kurdan bibin.”
