Li Bedlîs û Mûşê bi pêşengiya Platforma Saziyên Demokratîk û Komeleya Alimên Îslamî ya Mezopotamyayê ya Mûşê êrişên li ser Rojava hatin şermezarkirin. Gel diyar kir ku dê her tim li gel gelê Rojava bin.
Platforma Saziyên Demokratîk a Bedlîsê ji bo şermezarkirina êrişên çeteyên HTŞ û SMOyê yên bi piştgiriya Tirkiyeyê yên li ser Rojava, li navçeya Xelatê ya Bedlîsê daxuyaniya çapemeniyê da. Di daxuyaniya ku li ber avahiya Partiya Wekhevî û Demokrasiyê ya Gelan (DEM Partî) a Xelatê pêkhat de, pankarta bi nivîsa “Rojava wijdan e, berxwedan e, azadî ye, teslîm nabe” hate vekirin. Her wiha dovîzên bi nivîsa “Em nebin bira, em ê bibin şîva gura” û “Rojavaya Azad” hatin hilgirtin.
Girse li pêşiya avahiya DEM Partiyê ya navçeyê kom bû û heta cihê daxuyaniyê meşeke kurt li darxist. Di daxuyaniyê de Hevserokê DEM Partiyê ya Xelatê Fesih Bîtîm axivî û got: “Em êrişên li ser gelê Kurd yê Rojava qebûl nakin. Em van êrişan şermezar dikin.”
Piştre parlamentera DEM Partiya ya Bedlîsê Semra Çaglar Gokalp axivî. Gokalp bal kişan ser êrişên li ser Rojava û got: “Rojava ji bo me ne tenê parçeyak ax e, remza jiyaneke azad e.” Gokalp bi bîr xist ku çete keziyên jinan jêdikin û wiha pê de çû: “Porê me dê her tim ji bo we bibe xewnreşk.”
Parlamenterê DEM Partiyê yê Bedlîsê Huseyîn Olan jî da zanîn ku gelê Kurd li çar aliyên Kurdistanê û cîhanê bi yek dengî li dijî van êrişên hovane bertekên xwe tîne ziman û got: “Bila her kes bizanibe, gelê Kurd dê ruxmê hemû êrişan jî li gelê Rojava xwedî derkeve.”
Daxuyanî bi dirûşmên “Yek e yek e yek e Kurdistan yek e”, “Rojava Rojhilat e Kurdistan yek welat e” û “Rojava rûmeta me ye” bi dawî bû.
Mûş
Li Mûşê jî bi pêşengiya Komeleya Alimên Îslamî ya Mezopotamyayê ya Mûşê, li Parka Zarokan a li navenda bajêr ji bo şermezarkirina êrişên li ser Rojava, daxuyaniya çapemeniyê hat dayîn. Gelek welatî û endamên Platforma Saziyên Demokratîk ên Mûşê beşdarî daxuyaniyê bûn. Girseya ku li ber parkê kom bû, pêşî ji bo kesên ku li Rojava hatine kuştin ayetên Quranê xwendin. Piştî vê yekê, Yilmaz Çaglayan, serokê Komeleya Alimên Îslamî ya Mezopotamya ya Mûşê, diyar kir ku ew wekî alimên Îslamî êrişên li ser Rojava qebûl nakin. Pişt re, endamê komeleyê Yafes Dînar got, “Em qebûl nakin ku jinên li Rojava wekî xenîmetên şer werin dîtin.”
Daxuyanî bi berzkirina dirûşmeyan bi dawî bû.
