Siyasetmedarên Kurd di pîrozbahiya Newroza Agiriyê de axivîn û gotin: “Gelê Kurd bi rûhê Newrozê yê têkoşer û berxwedêr wê li Serokê xwe li şehîdên xwe û li pêvajoya aştî û civaka demokratîk xwedî derbikeve.”
Li Bazara Kevn a Kayê ya li navenda Agiriyê pîrozbahiya “Newroza Azadî û Yekîtiya Demokratîk” hate lidarxistin. Bi hezaran welatî beşdarî pîrozbahiyê bûn. Beriya pîrozbahî dest pê bike welatiyan li ber stranan govend gerand. Pîrozbahiyê bi deqeyek rêzgirtinê dest pê kir. Dayika yek ji cangoriya Newrozê Sema Yuce, Zennure Yuce, Parlamentera DEM Partiyê ya Agiriyê Necla Demîr, Parlamenterê DEM Partiyê yê Wanê Mahmud Dîndar û Hevşaredarê Bajarê Mezin ê Wanê Abdullah Zeydan tev li pîrozbahiyê bûn.
Ciwanan li qada Newrozê û li ser dikê posterên mezin ên Rêberê Gelê Kurd Abdullah Ocalan û Salih Muslim hildan. Her wiha wêneyên Rahşan Demîrel, Sema Yuce û Kemal Kurkut jî hatine hildan. Stranbêj Devrîm Çelîk û Aylîn Demîrkaya derketin ser dikê û strîn û gel li ber stranan wan govend gerand.
‘Ruhê berxwedêr me anî qadên Newrozê’
Parlamenter Necla Demîr pêşî axivî û wiha got: “Bi hezaran milet hatine çûyînê û bi hezaran Dehak jî hatine û çûne. Lê gelê Kurd li dijî hemû Dehakan jî li ser axa xwe jiyan kiriye û jiyan dikin. Ev jî bi xêre zanebûn, têkoşîn û berxwedanê bûye. Axa Kurdistanê axeke dewlemend e lewma hemû dewlet her tim êrişî axa Kurdistanê dikin. Gelê Kurd bi ruhê xwe yê berxwedêr û bi rêbertiya xwe hatiye roja îro ku li qadên azad Newrozê pîroz dike.”
Piştî axaftina Demîr, Zennure Yûce û siyasetmedaran agirê Newrozê pêxistin. Dûre ciwanan li dora agir govend gerand.
‘Newroz cangoriyan tîne bîra me’
Parlamenter Mahmut Dîndar jî axivî û bi bîr xist ku ev bi rojane gelê Kurd li qadan e û got: “Gel dibêje divê pêşiyê Serokê me azad bibe encax wisa ev pêvajo bi aramî pêş bikeve û serbikeve. Em jî li warê Ehmedê Xanî bang dikin ku em jî li pey paradîgmaya Abdullah Ocalan in û divê Rêberê me azad bibe ku axa me bibe baxçeyê gul û gulistanan. Ev sed sal e bi hezaran ciwanên me şehîd ketine. Heke îro li vê qadê em bikaribin biaxivin ev bi xêra şehîdên me ne. Em di şexsê Salih Muslim da hemû şehîdên azadiyê bi bîr tînin. Dema em dibêjin Newroz; Rahşan Demîrel, Mazlum Dogan, Zekiye Alkan… tên bîra me. Bi agirê ku wan bi bedena xwe xistî, agirê Newrozê bilind û geş dibe. Her wiha dema em dibêjin Newroz; Kemal Kurkut tê bîra me ku ew bi awayekî bêehlaqî hate qetilkirin. Em ê li ser xeta şehîdên Newrozê bimeşin û em ê xeta wan bi ser bixînin.”
‘Kurd azadiya rêberê xwe û nasnameya xwe dixwazin’
Paşê jî Hevşaredarê Wanê Abdullah Zeydan axivî û ev yek anî ziman: “Em Newroza tevahî hevrêyên xwe yên di girtîgehan de, yên ku li Rojava têkoşînê didin û Kurdên her çar parçeyên Kurdistanê pîroz dikin. Ev Newroz newroza azadiya Rêberê Gelê Kurd Abdullah Ocalan û yekîtiya gelê Kurd e. Gelê Kurd û dostên Kurdan li dijî eriş û polîtîkayên şerên taybet xwedî li Abdullah Ocalan û pêvajoya aştî û civaka demokratîk xwedî derketin. Heke di van sir û seqeman jî gelê Kurd li qadên Newrozê be, wateyeke vê yekê heye. Wateyê wê ew e ku gelê Kurd azadiya Rêberê xwe, azadiya siyasetmedarên xwe, azadiya nasnameya xwe dixwaze.”
Pîrozbahî li ber stranan û gerandina govendê bi dawî bû.
