Mûş – Endamên MÎA-FEDê Mihemed Zakir û Fîgen Keleş ku serdana konên berxwedanê yên li dijî JESê li gundê Xwarikê yê navçeya Gimgimê hatine vedan kirin, diyar kirin ku ola Îslamê li dijî talankirina xwezayê ye û ew dê ji bo parastina xwezayê piştgiriya xwe bidomînin.
Li navçeya Gimgimê ya Mûşê berxwedana gel a li dijî Santrala Enerjiyê ya Jeotermal (JES) didome. Berxwedana ku di 24ê Nîsana 2026an de bi mitîngê derbasî qonaxeke nû bû û di 2yê Gulana 2026an de veguherî nobeta konan, di roja xwe ya 37an de li gundê Xwarikê bi biryardarî berdewam dike. Ji Kurdistan û Tirkiyeyê gelek komele, dezgeh, sazî, şexsiyet û hwd. piştgiriyê didin berxwedana gelê Gimgimê û ziyareta wan dikin.
Endamên Federasyona Komeleyên Lêkolînên Îslamî yên Mezopotamyayê (MÎA-FED) Mihemed Zakir û Fîgen Keleş ku serdana konên gel kirin, behsa giringiya xwezayê di ola Îslamê de kirin.
‘Ev yek li gorî ola Îslamê heram e’
Mihemed Zakir bal kişand ser nêzîkatiya ola Îslamê ya li ser parastina xwezayê û got: “Çawa ku Xwedayê Teala Qurana Pîroz hildaye bin parastina Xwe, gerdûna ku afirandiye jî wisa dixwaze di cihê xwe de, bi reng û nîzamê wê bibîne û divê mirov wê gerdûnê xirab nekin. Îro dema em dinêrin, tê xwestin ku ev gerdûn bi destê dagirkeran were xirabkirin. Dema em ji çavê olê li vê xirabkirinê binerin, ev yek li gorî ola Îslamê heram e, çimkî ola Îslamê destûrê nade tiştekî wisa. Di ola Îslamê de hebûna daran, hebûna mûriyan û hebûna hemû zindiyan pîroz e. Ku ev zindî bi rehetî di nav dar û beran de bigerin, ev daxwaza Xwedayê Teala ye ji mirovan. Lewra Xwedayê Teala qedexe dike ku mirov mûriyekê biêşîne an jî çiqekî ji darekê bişkîne; ev yek li gorî dînê me ne rast e”
‘Parastina xwezayê li ser hemû mirovan ferz e’
Bi domdarî Mihemed Zakir diyar kir ku di vê çarçoveyê de îbadeta hecê mînakeke pir girîng e û got: “Heciyên ku diçin Mekkeyê, anku male Xwedê, ji pelê darê bigire heta li ser rêçûna xwe,li her tiştî baldar in. Di dema îhramê de nikarin pelê darekê jî biqetînin. Ev yek mînak e ji bo me ku em girîngiyê bidin parastina dar, rewar û sirûştê ku Xwedayê Teala afirandiye û em xwedî li wan derkevin. Di warê parastina xweza û gerdûnê de, li ser hemû mirovan ferz e ku bibin alîkarê hevdu.”
‘Em nehêlin ku xwezaya me bi destê dagirkeran xirab bibe’
Mihemed Zakir anî ziman ku Îslamê li hemberî van şîrketên ku xwezayê talan dikin, şertên girîng danîne û wiha pê de çû: “ Îslamê li hemberî van şîrketên ku xwezayê talan dikin, şertên girîng danîne. Divê ji bo van karan fetwaya meclîsa îslamî (alimên dînî) hebe. Heger fetwayeke wisa nehatibe girtin û li wir karên ku zirarê didin xwezayê bên kirin, ev yek li gorî Quranê heram e. Gerek mirovên me, xelkê me û gelê me vê rastiyê baş bizanibe. Ji ber vê yekê, ez ji gelê me daxwaz dikim ku li vî welatê xweş û pîroz xwedî derkevin û nehêlin ku bi destê dagirkeran xirab bibe.”
‘Em ê li ser esasên Îslamê, çand û sirûşta xwe biparêzin’
Fîgen Keleş jî diyar kir ku ew jî îro ji bo vî xelkî li wir in û ji bo jiyaneke paqij, ji bo ekolojiyê, ji bo xelk û miletê xwe hatine nobedariyê û got : “Em jî îro ji bo vî xelkî li vir in û dibêjin, Ji bo jiyaneke paqij, ji bo ekolojiyê, ji bo xelk û miletê me, em hatine nobedariyê. Em li ser rêbaza Îslamê dimeşin û bi wijdana xwe, çend roj hewce bike, em ê ew qas tevlî bibin, piştgiriya hevalên xwe bikin û alîkariya wan bikin. Em ê li ser esasên Îslamê, çand û sirûşta xwe biparêzin.”
