Sembola Dayikên Şemiyê Emîne Ocak a ku di 23’yê Tîrmehê de jiyana xwe ji dest dabû, bi merasîmeke girseyî li Goristana Gaziyê li kêlek kurê xwe Hasan Ocak hat definkirin.
Dayika Şemiyê Emîne Ocak di 20ê Hezîranê de ji ber krîza dil a ji ber têkçûna nefesê li beşa lênêrîna giran dihat dermankirin, di 23yê Tîrmehê de jiyana xwe ji dest da. Cenazeyê Emîne Ocak piştî merasîma li Qada Galatasarayê, birin Cemxaneya Gaziyê. Darbesta Emîne Ocak bi qumaşê reş ê bi wateya “Her dem şîn” hate nixumandin û bi kulîlkan hate xemilandin. Bi sedan kesên ku beşdarî merasîmê bûn, dirûşmên “Emîne Ocak nemir e”, “Yên winda dikin wê winda bibin”, “Kujer wê hesab bidin gel”, “Hêrsa dayikan wê kujeran bifetisîne” hatin berzkirin.
Li ser navê malbatê Dursun Guzel axivî û ji bo xwişka xwe Emîn got, “Beden dimire, lê can namir e. Xwişka min wê her tim di dilê me de bijî. Hemû canên ku li Qada Galatasarayê têdikoşin wê bi wê re têbikoşin.”
Dayika Emîne çinara Galatasarayê bû
Xizmê windayan Îrfan Bilgî diyar kir ku Emîne Ocak “çinara Galatasarayê” bû û wiha axivî: “Em ê wê oxir bikin, lê tiştên ku wê nîşanî me daye wê bidomin. Laşê wê ji nav me diçe, lê bawerî, berxwedan û hewldana wê ya domdar wê bi me re be. Em soz didin. Tu namirî, oxir be dayê.”
Ew sembola têkoşîna li dijî windakirinan bû
Parêzera malbata Ocak û parêzvana mafên mirovan Gulseren Yolerî jî anî ziman ku wê di 21ê Adara 1995an de, piştî windakirina Hasan Ocak, Emîne Ocak nas kiriye û wiha got, “Heke dayika Emîne îro li virbûya me yê hemûyan bi evînî hev hembêz kiriba. Dayika Emîne sembola têkoşîna li dijî windakirinan bû. Hîn jî kujer tên parastin, çarenûsa windayan di tariyê de ye.”
Heta dawiya jiyana xwe dev jimtêkoşînê berneda
Serokê Giştî yê ESP’ê Murat Çepnî diyar kir Dayika Emîne beriya her tiştî mamosteyek bûû wiha got: “Mamosteya têkoşînê bû, çalakvanek yekgirtî bû. Ew xaka têkoşîna azadî û edaletê ye. Lê Dayikên Şemiyê û malbatên windayan li vê xakê têkoşînek meşandin ku polîtîkaya windakirinê ya faşîzmê rawestand. Ev têkoşîn ji me re dibêje: Gava em bi hev re bin, armancê bigrin û li rex hev bin, em dikarin bi ser bikevin. Çawa ku me polîtîkaya windakirinê rawestand, em dikarin hesabê windayan jî bipirsin, hêza me ji bo vê heye. Dayika Emîne heta kêliya dawî qet dev ji têkoşînê berneda. Em li kolanên serhildana Gaziyê ne. Em li kolanên Hasan Ocak in. Wekî hevalên Hasan Ocak, ji bo têkoşîna Emîne, heval û hemû malbatên windayan bi serkeftin bi dawî bikin, ji bo hesabê windayan bipirsin, em li vir in.”
Sezgîn Tanrikulu jî wiha axivî: “Ji Dayika Emîne û yên çûyî re deynê me yê edalet û aştiyê heye. Sembola windakirinên bi zorê, torosên spî dîsa di nav me de ne. Mesele têkoşîna li dijî vê zîhniyetê ye.”
Berdevka DEM Partiyê Ayşegul Dogan jî got: “Li ber Dayika Emîne em tenê dikarin soz bidin ku em ê têkoşînê bidomînin, bi ser bixin, dev jê bernedin û bi ser bikevin. Wan rêyeke nû ji me re vekir. Em îro li vir ji bo Dayika Berfo, Dayika Elmas, ji bo dayikên ku li qadê dilê wan diçirîne û ji bo zarokên wan soz didin.”
Ji Însiyatîfa Malbatên Pirsûsê Dîlek Şeker jî wiha axivî: “Dema min bavê xwe veşart, Dayika Emîne ji min re got, ‘Netirse keça min, tu bûyî ez, tu bûyî çalakvanek edaletê, tu bûyî Dayika Şemiyê, di baxçeya me ya kulîlkan de tu jî heyî.”
Gulsum Elvan jî got: “Dayika Emîne ji roja destpêkê hat ba me û me hembêz kir” û diyar kir ku wê têkoşînê bidomîne.
Piştî axaftinan, cenazeyê Emîne Ocak bi dirûşman birin Goristana Gaziyê û li kêleka kurê wê hat definkirin.
