Li Hesekê di navbera HSD û hikûmeta Şamê de hevdîtinek nû pêk hat. Di civînê de navên nûnerên Herêma Bakur û Rojhilatê Sûriyeyê ji bo diyaloga bi desthilata Şamê re hatin eşkerekirin.
Di çarçoveya pêkanîna xalên peymana 10ê Adarê de, li bajarê Hesekê civîna duyemîn di navbera Fermandariya Giştî ya Hêzên Sûriya Demokratîk (HSD) û nûnerên desthilata Şamê de pêk hat. Di civînê de Fermandarê Giştî yê HSDê Mazlûm Ebdî û endama Fermandariya Giştî ya HSDê Rohilata Efrînê, serokê komîteya ji hêla desthilata Şamê ve ji bo temamkirina peymanê hatiye erkdarkirin Hisên El Selame û endamê komîteyê Mihemed Qenatirî amade bûn.
Di civînê de asta pêşdeçûna xalên peymanê, pêwîstiya rawestandina şer û pevçûnên li Sûriyeyê, Bendava Tişrînê dûrî êrişên leşkerî be hatin nîqaşkirin. Dîsa der barê avakirina komîteyekê ji bo vegera koçberên ji tevahî herêmên Sûriyeyê de nîqaş hatin kirin. Di civînê de navên endamên komîteya ku wê nûnertiya herêmên Bakur û Rojhilatê Sûriyeyê di diyaloga bi desthilata Şamê re bikin hatin eşkerekirin. Navên nûnerên ev in: Foza Yûsif, Ebid Hamid El Mihbaş, Ehmed Yûsif, Senherîb Bersûm, Sozdar Hacî. Meryem Îbrahîm û Yasir Silêman wê berdevkên fermî yên komîteyê bin. Ev civîn di çarçoveya pêkanîna xalên peymana HSDê û desthilata Şamê ya 10ê Adarê de pêk hat. Civîna yekemîn a pêkanîna xalên peymanê di 19ê Adarê de hatibû lidarxistin.
